വരാനിരിക്കുന്ന ചാമ്പ്യൻസ് ട്രോഫിക്കുള്ള ഇന്ത്യൻ ടീമിൽ നിന്നും യുവതാരം യശ്വസി ജെയ്‌സ്വാളിനെ ഒഴിവാക്കിയതിനെതിരെ സംസാരിച്ചിരിക്കുകയാണ് മുൻ ഇന്ത്യൻ സ്പിന്നർ രവിചന്ദ്രൻ അശ്വിൻ. അഞ്ച് സ്പിന്നർമാരെ ഇന്ത്യൻ ടീമിൽ ഉൾപ്പെടുത്തി ജെയ്‌സ്വാളിനെ ഒഴിവാക്കിയതിന് പിന്നിലെ യുക്തി എന്താണെന്നാണ് അശ്വിൻ ചോദ്യം ഉന്നയിച്ചത്. തന്റെ യൂട്യൂബ് ചാനലിലൂടെ സംസാരിക്കുകയായിരുന്നു മുൻ ഇന്ത്യൻ താരം.

'എനിക്ക് മനസ്സിലാകാത്ത കാര്യം എന്തെന്നാൽ ദുബായിലേക്ക് ഇന്ത്യ എത്ര സ്പിന്നർമാരെ കൊണ്ടുപോകുന്നു എന്നതാണ്. അഞ്ചു സ്പിന്നർമാരെയാണ് ഇന്ത്യ ടീമിൽ ഉൾപ്പെടുത്തിയത്. അതിനായി ജെയ്‌സ്വാളിനെ പുറത്താക്കി. ഒരു പരമ്പരയിൽ മൂന്നോ നാലോ സ്പിന്നർമാരെ ടീമിൽ എടുക്കുന്നതിനു മനസിലാക്കാം എന്നാൽ ചാമ്പ്യൻസ് ട്രോഫിയിൽ അഞ്ചു സ്പിന്നർ എന്തിനാണ്? എനിക്കറിയില്ല ഒരു സ്പിന്നർ വളരെ കൂടുതലാണെന്ന് ഞാൻ കരുതുന്നു,' അശ്വിൻ പറഞ്ഞു. 

കുൽദീപ് യാദവ്, വരുൺ ചക്രവർത്തി, വാഷിംഗ്ടൺ സുന്ദർ, രവീന്ദ്ര ജഡേജ, അക്‌സർ പട്ടേൽ എന്നീ അഞ്ചു സ്പിന്നർമാരുമായാണ് ഇന്ത്യ ചാമ്പ്യൻസ് ട്രോഫിയിൽ കളിക്കാനിറങ്ങുന്നത്. ആദ്യം പ്രഖ്യാപിച്ച ചാമ്പ്യൻസ് ട്രോഫിക്കുള്ള ഇന്ത്യൻ ടീമിൽ ജെയ്‌സ്വാൾ ഇടം നേടിയിരുന്നു. എന്നാൽ അവസാന നിമിഷത്തിൽ താരത്തെ ഒഴിവാക്കിക്കൊണ്ട് വരുൺ ചക്രവർത്തിയെ ടീമിൽ ഉൾപ്പെടുത്തുകയായിരുന്നു. ഇംഗ്ലണ്ടിനെതിരെയുള്ള ഏകദിന പരമ്പരയിൽ വരുൺ ചക്രവർത്തി ഇന്ത്യയ്ക്കുവേണ്ടി അരങ്ങേറ്റം കുറിച്ചിരുന്നു.

ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്. ചാമ്പ്യൻസ് ട്രോഫിയിൽ ഗ്രൂപ്പ് എയിൽ ഇന്ത്യ, ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഉള്ളത്. ഗ്രൂപ്പ് ബിയിൽ ഓസ്ട്രേലിയ, ഇംഗ്ലണ്ട്, അഫ്ഗാനിസ്ഥാൻ, ദക്ഷിണാഫ്രിക്ക എന്നീ ടീമുകളുമാണ് ഉള്ളത്.

ഐസിസി ചാമ്പ്യൻസ് ട്രോഫിക്കുള്ള ഇന്ത്യൻ ടീം

രോഹിത് ശർമ്മ (ക്യാപ്റ്റൻ), ശുഭ്മാൻ ഗിൽ (വൈസ് ക്യാപ്റ്റൻ), വിരാട് കോഹ്‌ലി, ശ്രേയസ് അയ്യർ, കെ എൽ രാഹുൽ (വിക്കറ്റ് കീപ്പർ), റിഷബ് പന്ത് (വിക്കറ്റ് കീപ്പർ), ഹർദിക് പാണ്ഡ്യ, അക്സർ പട്ടേൽ, വാഷിങ്‌ടൺ സുന്ദർ, കുൽദീപ് യാദവ്, ഹർഷിത് റാണ, മുഹമ്മദ് ഷമി, അർഷ്ദീപ് സിങ്, രവീന്ദ്ര ജഡേജ, വരുൺ ചക്രവർത്തി.