ജിദ്ദ: കഴിഞ്ഞ ഒരാഴ്ചക്കിടെ മാത്രം 10,822 അനധികൃത തമാസക്കാരെ നാടുകടത്തിയതായി സഊദി ആഭ്യന്തര മന്ത്രാലയം. ഫെബ്രുവരി ആറിനും പന്ത്രണ്ടിനും ഇടയിലുള്ള കാലയളവില്‍ മുപ്പതിനായിരത്തോളം നിയമലംഘകരെ വ്യക്തമായ യാത്രാരേഖകള്‍ ഇല്ലാതെ കണ്ടെത്തിയിട്ടുണ്ട്. രാജ്യത്തിന്റെ വിവിധ ഭാഗങ്ങളില്‍ നിന്നായി 22,663 പേരെയാണ് കഴിഞ്ഞ ആഴ്ച സഊദി സുരക്ഷാ സേന അറസ്റ്റു ചെയ്തത്. മന്ത്രാലയവുമായി ബന്ധപ്പെട്ട മറ്റു സര്‍ക്കാര്‍ ഏജന്‍സികളുടെ സഹകരണത്തോടെ നടത്തിയ പിശോധനയിലാണ് അറസ്റ്റ്. 

റെസിഡന്‍സി നിയമം ലംഘിച്ചതിനാണ് ഭൂരിഭാഗം പേരും അറസ്റ്റിലായത്. 13,799 പേരാണ് റെസിഡന്‍സി നിയമം ലംഘിച്ചതിന്റെ പേരില്‍ അറസ്റ്റിലായത്. അതിര്‍ത്തി സുരക്ഷ ലംഘിച്ചതിന്റെ പേരില്‍ 5,594 പേരും തെഴില്‍ നിയമം ലംഘിച്ചതിന്റെ പേരില്‍ 3,270 പേരും അറസ്റ്റിലായി. സഊദിയിലേക്ക് അനധികൃതമായി പ്രവേശിക്കാന്‍ ശ്രമിച്ച് അറസ്റ്റിലായവരുടെ എണ്ണം 2,133 ആണ്. ഇവരില്‍ മിക്കവരും എത്യോപ്യന്‍ പൗരന്മാരും ബാക്കിയുള്ളവര്‍ യെമന്‍ പൗരന്മാരുമാണ്. ഇതിനു പുറമേ അനധികൃതമായി രാജ്യം വിടാന്‍ ശ്രമിച്ച 184 പേരെയും സഊദി ഭരണകൂടം അറസ്റ്റു ചെയ്തു.

നിയമലംഘകര്‍ക്ക് സഹായം നല്‍കിയ 14 പേരെയും അറസ്റ്റ് ചെയ്തിട്ടുണ്ട്. അനധികൃത താമസത്തിന്റെ പേരില്‍ അറസ്റ്റു ചെയ്യപ്പെട്ട 38,777 പേരില്‍ 4,069 പേര്‍ സ്ത്രീകളും 34,708 പേര്‍ പുരുഷന്മാരുമാണ്.  

രാജ്യത്തേക്ക് അനധികൃതമായി കുടിയേറുന്ന വ്യക്തികളെ എളുപ്പത്തില്‍ പ്രവേശിക്കാന്‍ സഹകരിക്കുകയും അവരുടെ താമസ സ്ഥലത്തോ മറ്റോ സൗകര്യങ്ങളും സഹായങ്ങളും ഒരുക്കി നല്‍കുകയോ ചെയ്യുന്ന ഏതൊരാള്‍ക്കും 15 വര്‍ഷം വരെ തടവും ഒരു ദശലക്ഷം റിയാല്‍ വരെ പിഴയും ലഭിക്കുമെന്നും ആഭ്യന്തര മന്ത്രാലയം മുന്നറിയിപ്പ് നല്‍കി.