തിരുവനന്തപുരം: സംസ്ഥാനത്ത് എസ്എസ്എല്‍സി മോഡല്‍ പരീക്ഷകള്‍ ഇന്ന് നടക്കാനിരിക്കെ ചോദ്യപേപ്പര്‍ പ്രതിസന്ധി രൂക്ഷമാകുന്നു. പല സ്‌കൂളുകളും ഇതുവരെ ചോദ്യപേപ്പറുകള്‍ എത്തിയിട്ടില്ല. പേപ്പര്‍ ലഭിച്ച സ്‌കൂളുകളിലാവട്ടെ കുട്ടികളുടെ എണ്ണത്തിന്റെ നേര്‍പകുതി പേപ്പറുകള്‍ മാത്രമാണ് ലഭിച്ചത്. അച്ചടി പൂര്‍ത്തിയാവാത്തതിനാല്‍ പ്രതിസന്ധി ഉണ്ടായി എന്നാണ് വിശദീകരണം. 

ഇന്ന് മുതലാണ് മോഡല്‍ പരീക്ഷകള്‍ ആരംഭിക്കുക. രാവിലെയും ഉച്ചയ്ക്കുമായി രണ്ട് പരീക്ഷകളുണ്ട്. ഭാഷാ വിഷയങ്ങളാണ് ആദ്യം. 9.45ന് പരീക്ഷ തുടങ്ങും. എന്നാല്‍ പലയിടങ്ങളിലും ചോദ്യ പേപ്പറുകള്‍ ലഭിച്ചിട്ടില്ല. 

സാധാരണ ഗതിയില്‍ പരീക്ഷകള്‍ക്ക് രണ്ട് ദിവസം മുന്‍പെങ്കിലും ചോദ്യപേപ്പറുകള്‍ സ്‌കൂളുകളില്‍ എത്തിക്കും. എന്നാല്‍ ഇത്തവണ അതുണ്ടായില്ലെന്ന് മാത്രമല്ല അച്ചടി പൂര്‍ത്തിയാകാത്തത് മൂലം പ്രതിസന്ധി ഉണ്ടായി എന്ന വിശദീകരണമാണ് അധികാരികളില്‍ നിന്ന് ലഭിച്ചത്.

നിലവില്‍ ചോദ്യപേപ്പര്‍ ലഭിച്ച സ്‌കൂളുകളില്‍ കുട്ടികളുടെ എണ്ണത്തിന് നേര്‍പകുതി ചോദ്യപേപ്പറുകള്‍ മാത്രമാണെത്തിയതെന്ന പരാതിയുണ്ട്. ഇനി ആവശ്യമുള്ളവ ഫോട്ടോസ്റ്റാറ്റ് എടുത്ത് നല്‍കാനുള്ള നിര്‍ദേശമാണ് വിദ്യാഭ്യാസ വകുപ്പില്‍ നിന്ന് ലഭിച്ചതെന്നും അധ്യാപകര്‍ പറഞ്ഞു. 

അതേസമയം പരീക്ഷ നടത്തിപ്പിലെ ക്രമക്കേടിനെതിരെ പ്രതിപക്ഷ അധ്യാപക സംഘടനകള്‍ രംഗത്തെത്തി. പരീക്ഷ നടത്തിപ്പ് തകിടം മറിക്കാനുള്ള നീക്കം അംഗീകരിക്കില്ലെന്ന് കെപിഎസ്ടിഎ അറിയിച്ചു.

sslc model exams will starts today morning crisis with question paper