കൊച്ചി: പാതിവില തട്ടിപ്പ് കേസില്‍ റിട്ടയേഡ് ജസ്റ്റിസ് സി എന്‍ രാമചന്ദ്രന്‍ നായര്‍ക്കെതിരെ കേസെടുത്ത സംഭവത്തില്‍ വിമര്‍ശനവുമായി ഹൈക്കോടതി. മനസിരുത്തിയാണോ കേസെടുക്കാന്‍ പൊലീസ് തീരുമാനമെടുത്തതെന്ന് കോടതി ചോദിച്ചു. 

ഭരണഘടനാ പദവി വഹിച്ച ആള്‍ക്കെതിരെയാണ് കേസെടുത്തത്. ജനങ്ങള്‍ക്ക് നീതിന്യായ വ്യവസ്ഥയോടുള്ള വിശ്വാസ്യതയെ ബാധിക്കും. വസ്തുതകള്‍ പരിശോധിച്ചിരുന്നോ എന്നും തെളിവുകളുണ്ടെങ്കില്‍ അറിയിക്കൂവെന്നും  കോടതി നിര്‍ദേശിച്ചു.

ജസ്റ്റിസ് രാമചന്ദ്രന്‍ നായരെ പ്രതി ചേര്‍ത്തത് പൊലീസ് നടത്തിയ അധികാര ദുര്‍വിനിയോഗമാണെന്നും ജുഡീഷ്യറിയിലുള്ള വിശ്വാസം തകര്‍ക്കാനുള്ള ഗൂഡലക്ഷ്യത്തോടെ എടുത്ത കേസാണെന്നും ചൂണ്ടിക്കാട്ടി ഒരുകൂട്ടം അഭിഭാഷകരാണ് ഹൈക്കോടതിയെ സമീപിച്ചത്. ഹരജി പരിഗണിച്ച ജസ്റ്റിസ് മുഹമ്മദ് മുഷ്താഖിന്റെ അധ്യക്ഷതയിലുള്ള ഡിവിഷന്‍ ബെഞ്ച് പൊലിസിനോട് വിശദീകരണം തേടി. കേസെടുക്കാന്‍ ആധാരമായ തെളിവുകള്‍ സഹിതം ഒരാഴ്ചയ്ക്കകം വിശദീകരണം നല്‍കാനും കോടതി നിര്‍ദ്ദേശിച്ചു. എന്നാല്‍ ഹരജി നിലനില്‍ക്കില്ലെന്നാണ് പ്രോസിക്യൂഷന്‍ നിലപാടെടുത്തത്. മനസ്സിരുത്തി തന്നെയാണ് നടപടി സ്വീകരിച്ചതെന്നും പ്രോസിക്യൂഷന്‍ മറുപടി നല്‍കി.