ഗസ്സ: മുഴുവന്‍ ബന്ദികളേയും വിട്ടയക്കാന്‍ തയ്യാറെന്ന് പ്രഖ്യാപിച്ച് ഹമാസ്. ഒറ്റത്തവണയായി തന്നെ ശേഷിക്കുന്ന ബന്ദികളെ മോചിപ്പിക്കാന്‍ തയ്യാറാണെന്നാണ് ഹമാസ് അറിയിച്ചിരിക്കുന്നത്. അതിനായി രണ്ട് ഉപാധികള്‍ പ്രതിരോധ സംഘം മുന്നോട്ട് വെച്ചിട്ടുണ്ട്. സമ്പൂര്‍ണ വെടിനിര്‍ത്തല്‍ ആണ് അതില്‍ ഒന്നാമത്തെ ഉപാധി. ഗസ്സയില്‍ നിന്ന് ഇസ്‌റാഈല്‍ സൈന്യം പൂര്‍ണമായും പിന്‍മാറണം എന്നും സംഘം ആവശ്യപ്പെടുന്നു. രണ്ടാം ഘട്ട വെടിനിര്‍ത്തല്‍ ചര്‍ച്ചക്കിടെയാണ് ഹമാസിന്റെ പ്രഖ്യാപനം. 

ശനിയാഴ്ച ആറ് ഇസ്‌റാഈലി ബന്ദികളെ കൂടി മോചിപ്പിച്ചേക്കുമെന്ന് ഹമാസ് നേരത്തെ അറിയിച്ചിരുന്നു.  വ്യാഴാഴ്ച നാല് ബന്ദികളുടെ മൃതദേഹവും ഹമാസ് വിട്ടുനല്‍കും. ഗസ്സയിലേക്ക് മൊബൈല്‍ വീടുകളും വലിയ ഉപകരണങ്ങളും കടത്തിവിടാന്‍ ഇസ്‌റാഈല്‍ തയ്യാറാവുകയാണെങ്കില്‍ ഹമാസ് ശനിയാഴ്ച ആറ് ബന്ദികളെ കൂടി വിട്ടയക്കുമെന്നാണ് അറിയിച്ചിരുന്നത്. വ്യാഴാഴ്ച നാല് ബന്ദികളുടെ മൃതദേഹം വിട്ടുനല്‍കുമെന്ന് ഹമാസ് നേരത്തെ തന്നെ അറിയിച്ചിരുന്നു.

അതേസമയം, വെടിനിര്‍ത്തിയിട്ടും ഗസ്സയിലെ കുട്ടികള്‍ കടുത്ത ദുരിതമനുഭവിക്കുന്നത് തുടരുകയാണെന്ന് യുനിസെഫ് അറിയിക്കുന്നു. ഭക്ഷണവും വെള്ളവും പാര്‍പ്പിടവും ആരോഗ്യ സംരക്ഷണവും വസ്ത്രങ്ങള്‍ പോലും കുട്ടികള്‍ക്ക് കിട്ടുന്നില്ലെന്ന് ഗസ്സ സന്ദര്‍ശിച്ച യൂണിസെഫ് സംഘം ചൂണ്ടിക്കാട്ടി. 

അതിനിടെ, തെക്കന്‍ ലബനനില്‍ നിന്ന്  സൈന്യം പിന്‍മാറുന്നതിനുള്ള സമയം അവസാനിച്ചെങ്കിലും അതിര്‍ത്തിയിലെ അഞ്ച് തന്ത്രപ്രധാന കേന്ദ്രങ്ങളില്‍ നിന്ന് പിന്‍മാറില്ലെന്ന നിലപാടിലാണ് ഇസ്‌റാഈല്‍. 
ഹിസ്ബുല്ലയുമായുള്ള വെടിനിര്‍ത്തല്‍ കരാര്‍ പ്രകാരം ലബനാനില്‍ നിന്ന് ഇസ്‌റാഈല്‍ സൈന്യം പിന്‍വാങ്ങലിനുള്ള സമയപരിധി ഇന്ന് അവസാനിച്ചിട്ടുണ്ട്.  ഇന്ന് രാവിലെ ഇസ്‌റാഈല്‍ സേന തെക്കന്‍ ലെബനാന്‍ ഗ്രാമങ്ങളില്‍ നിന്ന് മാത്രമാണ് പിന്‍വാങ്ങിയത്.  പക്ഷേ അഞ്ച് പ്രധാന സ്ഥാനങ്ങളില്‍ തുടരുകയാണ്. ഇസ്‌റാഈല്‍ സുരക്ഷയ്ക്ക് ഇത് പ്രധാനമാണെന്നാണ് ഐ.ഡി.എഫ് നല്‍കുന്ന വിശദീകരണം.