കോട്ടയം : പുതിയ കാർ വാങ്ങുക എന്നത് ആരുടെയും സ്വപ്നവും ആ​ഗ്രഹവുമൊക്കെ തന്നെയാണ്. പലരും മാസങ്ങൾ വരെയാണ് ബുക്ക് ചെയ്തിട്ട് വാഹനത്തിനു വേണ്ടി കാത്തിരിക്കുകയും ചെയ്യുന്നത്. ഇഷ്ടപ്പെട്ട വാഹനത്തിന് പറഞ്ഞ തുകയും നൽകി മാസങ്ങൾ കാത്തിരുന്ന് കിട്ടിയതാകട്ടെ ഒരു വർഷം പഴക്കമുള്ള കാർ. കോട്ടയം, വാഴൂർ സ്വദേശി സി ആർ മോഹനൻ അങ്ങനെ വിട്ട് കൊടുക്കാൻ തയാറായില്ല . ബുക്ക് ചെയ്ത കാറിനു പകരം പഴയ കാർ നൽകിയ മണിപ്പുഴയിലുള്ള ഇൻഡസ് മോട്ടോഴ്സിനെതിരെ പരാതി നൽകി. ഇപ്പോഴിതാ പുതിയ കാർ നൽകാൻ ഉത്തരവിട്ടിരിക്കുകയാണ് ഉപഭോക്തൃ കമ്മീഷൻ. 

2023 ഡിസംബർ ആറിനാണ് മോഹനൻ മാരുതി സെലീറിയോ ​ഗ്ലിസ്റ്ററിങ്ങ് ​ഗ്രേ കളർ ബുക്ക് ചെയ്തത് . ഈ നിറത്തിലുള്ള കാർ സ്റ്റോക്കില്ലെന്നും അഞ്ച് മാസത്തോളം കാത്തിരിക്കേണ്ടി വരുമെന്നും സ്ഥാപനത്തിലെ അധികൃതർ അറിയിച്ചു . ഇതനുസരിച്ച് മുഴുവൻ പണവും അടയ്ക്കുകയും 2024 ജനുവരി എട്ടിന് കാർ ഡെലിവറി ചെയ്യുകയും ചെയ്തു . 

 പിന്നീട് സംശയം തോന്നിയ മോഹനൻ രേഖകൾ വിശദമായി പരിശോധിച്ചപ്പോഴാണ് കബളിക്കപ്പെട്ടതായി ബോധ്യമാകുന്നത് . ഒരു വർഷം പഴക്കമുള്ള കാറിമായി മോഹനൻ ഇൻഡസ് മോട്ടോഴ്സ് അധിക‍ൃതരെ സമീപിച്ചെങ്കിലും പ്രതികരണമുണ്ടായില്ല . തുടർന്നാണ് ഉപഭോക്തൃ കമ്മീഷനിൽ പരാതി നൽകിയത്. 

ഒരു വർഷം പഴക്കമുള്ള കാർ പരാതിക്കാരന് നൽകിയത് തികച്ചും വിട്ടുവീഴ്ച അർഹിക്കാത്തതും വ്യാപാര വിപണി മേഖലയിൽ ഇത്തരം പ്രവണതകൾ പാടില്ലെന്നും അഡ്വ. വി.എസ് മനുലാൽ പ്രസിഡന്റായും ആർ ബിന്ദു , കെ.എം ആന്റോ എന്നിവർ മെമ്പർമാരുമായുള്ള കമ്മീഷൻ വിലയിരുത്തി.

മുപ്പത് ദിവസത്തിനുള്ളിൽ സമാനമായ പുതിയ വാഹനവും 50,000 രൂപ ഉടമസ്ഥന് നഷ്ട പരിഹാരവും 5000 രൂപ കോടതി ചെലവ് നൽകാനും ഉത്തരവിട്ടു.