ഷാര്‍ജ ആസ്ഥാനമായി പ്രവര്‍ത്തിക്കുന്ന എയര്‍ലൈന്‍ കമ്പനിയാണ് എയര്‍ അറേബ്യ. ഇപ്പോള്‍ യാത്രക്കാര്‍ക്കായി മികച്ച ഓഫറുമായി വന്നിരിക്കുകയാണ് എയര്‍ അറേബ്യ. സൂപ്പര്‍ സെയില്‍ എന്നു പേരിട്ടിരിക്കുന്ന ഓഫറിലൂടെ അഞ്ചു ലക്ഷത്തോളം സീറ്റുകളിലാണ് കമ്പനി ടിക്കറ്റ് ഇളവ് വാഗ്ദാനം ചെയ്തിരിക്കുന്നത്. 

ഇന്ത്യയില്‍ നിന്നുള്ള എയര്‍ അറേബ്യ സര്‍വീസുകളും ഓഫറിന്റെ പരിധിയില്‍ വരുമെന്നതിനാല്‍ നാട്ടിലേക്കും തിരിച്ചുമുള്ള യാത്ര എയര്‍ അറേബ്യയിലാക്കാന്‍ ഇതിനകം തന്നെ നിരവധി പ്രവാസികള്‍ തീരുമാനിച്ചിട്ടുണ്ട്. ഇന്ത്യയില്‍ നിന്നും യഎഇയിലെ ഏറ്റവും പ്രധാനപ്പെട്ട മൂന്നു വിമാനത്താവളങ്ങളായ ഷാര്‍ജ, അബൂദബി, റാസല്‍ഖൈമ എന്നിവിടങ്ങളിലേക്കുള്ള നോണ്‍ സ്‌റ്റോപ്പ് ഫ്‌ളൈറ്റുകളും മിലാന്‍, നെയ്‌റോബി, ടിബിലിസി, ബാക്കു, കെയ്‌റോ, ക്രാക്കോ തുടങ്ങിയ ആഗോള ലക്ഷ്യസ്ഥാനങ്ങളിലേക്കുള്ള കണക്ഷനുകളും ഈ ഓഫറിന്റെ പരിധിയില്‍ വരും. 

5914 രൂപ മുതലാണ് ടിക്കറ്റ് നിരക്ക് തുടങ്ങുന്നത്. 2025 സെപ്റ്റംബര്‍ 1 മുതല്‍ മാര്‍ച്ച് ഇരുപത്തെട്ട് വരെയുള്ള യാത്രകള്‍ക്കായാണ് ഇപ്പോള്‍ ടിക്കറ്റു വില്‍പ്പന ആരംഭിച്ചിരിക്കുന്നത്. മാര്‍ച്ച് 2ാണ് ഈ ഓഫറില്‍ യാത്രക്കാര്‍ക്ക് ഈ ടിക്കറ്റു നിരക്കില്‍ ബുക്ക് ചെയ്യാനുള്ള അവസാന തീയതി. തിരുവനന്തപുരം, കൊച്ചി, കോഴിക്കോട്, ബെംഗളുരു, ഹൈദരാബാദ്, ചെന്നൈ, കൊല്‍ക്കത്ത, ഡല്‍ഹി, നാഗ്പൂര്‍, കോയമ്പത്തൂര്‍, ഗോവ എന്നിവിടങ്ങളില്‍ നിന്നും യുഎഇയിലേക്ക് പുറപ്പെടുന്ന നോണ്‍ സ്‌റ്റോപ്പ് വിമാനങ്ങളില്‍ 5914 രൂപയുടെ ഓഫര്‍ ലഭ്യമാകുമെന്ന് എയര്‍ അറേബ്യ അധികൃതര്‍ പറഞ്ഞു. 

എയര്‍ അറേബ്യയുടെ വെബ്‌സൈറ്റ് സന്ദര്‍ശിച്ച് പോകേണ്ട സ്ഥലവും തീയതിയും സെലക്ട് ചെയ്ത ശേഷം ഡിസ്‌ക്കൗണ്ട് തുകയുടെ സര്‍വീസ് തിരഞ്ഞെടുത്ത് ഫ്‌ളൈറ്റ് ബുക്ക് ചെയ്യാവുന്നതാണ്.