ബെയ്ജിങ്: ഇന്ത്യയുമായി ചേർന്ന് സംഘർഷങ്ങളും അഭിപ്രായവ്യത്യാസങ്ങളും ശരിയായി കൈകാര്യം ചെയ്യാൻ ചൈന തയ്യാറാണെന്ന് ചൈനീസ് വിദേശകാര്യ മന്ത്രി വാങ് യി. ഷാങ്ഹായ് കോഓപ്പറേഷൻ ഓർഗനൈസേഷൻ (എസ്.സി.ഒ.) യോഗത്തിനായി ബെയ്ജിങിലെത്തിയ ഇന്ത്യൻ വിദേശകാര്യ മന്ത്രി എസ്. ജയശങ്കറുമായുള്ള ചർച്ചയിൽ വാങ് യി ഇക്കാര്യം വ്യക്തമാക്കി. അഭിപ്രായവ്യത്യാസങ്ങൾ തർക്കങ്ങളായോ മത്സരം സംഘർഷമായോ മാറരുതെന്നും അദ്ദേഹം ഊന്നിപ്പറഞ്ഞു.

ബഹുരാഷ്ട്ര വ്യാപാര സംവിധാനത്തെ സംരക്ഷിക്കുന്നതിനും, ആഗോള ഉൽപ്പാദന-വിതരണ ശൃംഖലയിൽ സ്ഥിരത ഉറപ്പാക്കുന്നതിനും ഇന്ത്യയുമായി സഹകരിക്കാൻ ചൈന ഒരുക്കമാണെന്ന് വാങ് യി അറിയിച്ചു. "സംശയത്തിന് പകരം ഇരുരാഷ്ട്രങ്ങളും പരസ്പരം വിശ്വസിക്കണം, മത്സരത്തിന് പകരം സഹകരിക്കണം," എന്ന് അദ്ദേഹം പറഞ്ഞതായി റോയിട്ടേഴ്സ് റിപ്പോർട്ട് ചെയ്തു. ഇന്ത്യ-ചൈന ബന്ധത്തിന്റെ അടിത്തറ പരസ്പര വിജയമാണെന്നും അദ്ദേഹം കൂട്ടിച്ചേർത്തു.

ഇരുരാഷ്ട്രങ്ങളും ദീർഘകാല പദ്ധതികൾ ആവിഷ്കരിക്കണമെന്നും, നല്ല അയൽക്കാർ എന്ന നിലയിൽ സൗഹൃദത്തോടെ പരസ്പര ബഹുമാനവും വിശ്വാസവും ഊട്ടിയുറപ്പിക്കണമെന്നും വാങ് യി നിർദേശിച്ചു. സമാധാനപരമായ സഹവർത്തിത്വവും പൊതുവികസനവും വിജയകരമായ സഹകരണവും ഉറപ്പാക്കാൻ ഇരുപക്ഷവും ഒരു മാർഗം കണ്ടെത്തണമെന്ന് ചൈനീസ് സ്റ്റേറ്റ് ന്യൂസ് ഏജൻസി ഷിൻഹ്വ റിപ്പോർട്ട് ചെയ്തു.