ആലപ്പുഴ: ആലപ്പുഴയിൽ വീട്ടമ്മയെ കെട്ടിയിട്ട് സ്വർണവും പണവും കവർന്നു. മാമ്പുഴക്കരയിലെ വേലിക്കെട്ടിൽ കൃഷ്ണമ്മയുടെ വീട്ടിലാണ് സംഭവം നടന്നത്. മൂന്നര പവൻ സ്വർണവും 36,000 രൂപയുമാണ് മോഷണം പോയത്. ഇതിനു പുറമേ എടിഎം കാർഡ് ഓട്ടുപാത്രങ്ങൾ എന്നിവയും മോഷണം പോയി. 62കാരിയായ വീട്ടമ്മ മാത്രമാണ് ഉണ്ടായിരുന്നത്.

മോഷണം നടത്താനായി നാല് പേരാണ് എത്തിയിരുന്നതെന്നും കവർച്ച നടത്തിയ ശേഷം വീട്ടുജോലിക്കാരിയും ഇവർക്കൊപ്പം രക്ഷപ്പെട്ടെന്നും കൃഷ്ണമ്മ പറഞ്ഞു. രാത്രി അടുക്കള വാതിലിലൂടെ നാലുപേർ വീടിനകത്ത് കടക്കുകയും തന്നെ കെട്ടിയിട്ട് അലമാര തുറന്ന് മോഷണം നടത്തുകയായിരുന്നുവെന്നും കൃഷ്ണമ്മ പറഞ്ഞു. മോഷ്ടാക്കൾ തന്നെ അടിച്ചുവെന്നും ഇതിന് പിന്നാലെ തൻ്റെ ബോധം നഷ്ടപ്പെട്ടുവെന്നും വീട്ടമ്മ വ്യക്തമാക്കി. സംഭവത്തിനുശേഷം വീട്ടുജോലിക്കാരി മോഷ്ടാക്കൾക്കൊപ്പം പോയത് തനിക്ക് വിശ്വസിക്കാൻ സാധിച്ചില്ലെന്നും വീട്ടമ്മ പറഞ്ഞു.