തിരുവനന്തപുരം:സംസ്ഥാനത്തെ കായിക സംഘടനകൾക്കിടയിലെ പ്രശ്നങ്ങൾ രൂക്ഷമാകുന്നു.തിരുവനന്തപുരം ജില്ല സ്പോർട്സ് കൗൺസിൽ പ്രസിഡന്‍റ് എസ് എസ് സുധീറിനെ പ്രസിഡന്‍റ് സ്ഥാനത്ത് നിന്ന് മാറ്റിയിരിക്കുകയാണ്.കായിക മന്ത്രിയുടെ ഒത്തുകളി പരാമർശത്തിനെതിരായി ഹാൻഡ് ബോൾ താരങ്ങൾ നടത്തിയ സമരത്തെ പിന്തുണച്ച സുധീറിനെതിരെ സംസ്ഥാന സ്പോർട്സ് കൗൺസിൽ പ്രസിഡന്‍റ് രംഗത്തെത്തിയിരുന്നു.

ഇതിനു പിന്നാലെയാണ് തിരുവനന്തപുരം ജില്ല സ്പോർട്സ് കൗൺസിൽ പ്രസിഡന്‍റ് സ്ഥാനത്ത് നിന്ന് സുധീറിനെ മാറ്റിയത്. കേരള ഒളിമ്പിക് അസോസിയേഷൻ പ്രസിഡന്‍റ് സുനിൽ കുമാറിന്‍റെ അനുയായാണ് എസ് എസ് സുധീർ. സുധീറിനെ സ്ഥാനത്ത് നിന്ന് മാറ്റിയത് കായിക മന്ത്രിയുടെ പ്രതികാര നടപടിയാണെന്നാണ് ഒളിമ്പിക് അസോസിയേഷന്‍റെ ആരോപണം. വിഷയത്തിൽ നാളെ ഒളിമ്പിക് അസോസിയേഷൻ അടിയന്തര യോഗം വിളിച്ചിട്ടുണ്ട്.