തിരുവനന്തപുരം: മുഖ്യമന്ത്രി പിണറായി വിജയന്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കറുമായി കൂടികാഴ്ച നടത്തി. സൗഹൃദ സന്ദര്‍ശനമായിരുന്നുവെന്ന് രാജ്ഭവന്‍ അറിയിച്ചു. രാവിലെ രാജ്ഭവനിലെത്തിയ മുഖ്യമന്ത്രി പത്ത് മിനിറ്റോളം ഗവര്‍ണ്ണറുമായി ചര്‍ച്ച നടത്തി. 

ബില്ലുകളില്‍ തീരുമാനം വൈകരുതെന്നതടക്കമുള്ള ആവശ്യങ്ങള്‍ കൂടിക്കാഴ്ച്ചയില്‍ മുഖ്യമന്ത്രി മുന്നോട്ട് വെച്ചതായാണ് സൂചന. സ്വകാര്യ സര്‍വ്വകലാശാല ബില്‍ മൂന്നിന് നിയമസഭ പരിഗണിക്കുന്നുണ്ട്. 

യുജിസി കരട് ഭേദഗതിക്കെതിരെ കേരളം ജനുവരി 20ന് ദേശീയ കോണ്‍ഫറന്‍സ് സംഘടിപ്പിച്ചിരുന്നു. ഇതില്‍ ഗവര്‍ണ്ണര്‍ നേരിട്ട് മുഖ്യമന്ത്രിയെ വിളിച്ച് അതൃപ്തി അറിയിച്ചിരുന്നു. ഇതേ തുടര്‍ന്ന് യുജിസി കരടിനെതിരെയെന്ന പ്രയോഗം മാറ്റിയിരുന്നു. ഇതിനുശേഷമുള്ള ആദ്യ കൂടിക്കാഴ്ച്ചയാണ് തിങ്കളാഴ്ച്ച രാജ്ഭവനില്‍ നടന്നത്.