കോൺകാഫ് ചാമ്പ്യൻസ് കപ്പിലെ മത്സരത്തിനിടെ ഇന്റർ മയാമി സൂപ്പർതാരം ലയണൽ മെസിയോട് ഓട്ടോഗ്രാഫ് ചോദിച്ച മെക്‌സിക്കൻ റഫറി മാർക്കോ അന്റോണിയോ ഒർട്ടിസ് നാവക്ക് കനത്ത തിരിച്ചടി. മെസിയോട് ഓട്ടോഗ്രാഫ് ചോദിച്ച റഫറിക്ക് ആറ് മാസത്തെ സസ്പെൻഷനാണ് ലഭിച്ചത്. കോൺകാ കാഫിൽ സ്പോർട്ടിങ് കെസിക്കെതിരെയുള്ള മത്സര ശേഷമാണ് മെക്‌സിക്കൻ റഫറി മെസിയോട് ഓട്ടോഗ്രാഫ് ആവശ്യപ്പെട്ടത്. ഇതോടെ ഓഗസ്റ്റ് വരെയുള്ള ചാമ്പ്യൻസ് കപ്പ്, അന്താരാഷ്ട്ര, കോൺകാഫ് തുടങ്ങിയ മത്സരങ്ങൾ നിയന്ത്രിക്കാൻ അന്റോണിയോക്ക് സാധിക്കില്ല. എന്നാൽ മെക്‌സിക്കോയിലെ ലിഗ എംഎക്‌സിലെ മത്സരങ്ങൾ നിയന്ത്രിക്കാൻ അന്റോണിയോക്ക് സാധിക്കും. 

ഈ വിലക്ക് നേരിട്ടതിന് പിന്നാലെ മെക്സിക്കൻ റഫറി തന്റെ തെറ്റ് അംഗീകരിക്കുകയും കമ്മിറ്റിയോട് ക്ഷമാപണം നടത്തുകയും ചെയ്‌തു, ഒരു കുടുംബാംഗത്തിന് നൽകാനാണ് താൻ മെസിയോട് ഓട്ടോഗ്രാഫ് ആവശ്യപ്പെട്ടതെന്നും റഫറി വ്യക്തമാക്കി. മത്സരത്തിൽ എതിരില്ലാത്ത ഒരു ഗോളിന് ഇന്റർ മയാമി ആണ് വിജയിച്ചിരുന്നത്. മത്സരത്തിൽ മയാമിക്കായി വിജയ ഗോൾ നേടിയതും മെസി തന്നെയാണ്. 

അതേസമയം പുതിയ സീസണിലെ ആദ്യ മത്സരത്തിൽ ഇന്റർ മയാമി സമനില നേടിയിരുന്നു. ന്യൂയോർക്ക് സിറ്റിയാണ് മയാമിയെ സമനിലയിൽ കുരുക്കിയത്.  മത്സരത്തിൽ ഇരു ടീമികളും രണ്ട് ഗോളുകൾ വീതം നേടി പോയിന്റുകൾ പങ്കുവെക്കുകയായിരുന്നു. മത്സരത്തിൽ ഇന്റർ മയാമിക്ക് വേണ്ടി ടോമസ് അലിവസ് അഞ്ചാം മിനിറ്റിൽ തന്നെ ഗോൾ നേടുകയായിരുന്നു. എന്നാൽ 26ാം മിനിറ്റിൽ മിറ്റ്ജ ഇലെനിക്കിലൂടെ ന്യൂയോർക്ക് സിറ്റി ഗോൾ തിരിച്ചടിക്കുകയായിരുന്നു. ഒടുവിൽ ആദ്യ പകുതിയിൽ ഇരു ടീമുകളും ഓരോ ഗോൾ വീതം നേടി സമനിലയിൽ പിരിയുകയായിരുന്നു.

രണ്ടാം പകുതിയിൽ 55ാം മിനിറ്റിൽ അലോൺസോ മാർട്ടിനസ് ന്യൂയോർക്കിനായി രണ്ടാം ഗോൾ നേടി. ന്യൂയോർക്ക് സിറ്റി വിജയം ഉറപ്പിച്ച നിമിഷത്തിൽ ആയിരുന്നു മത്സരത്തിന്റെ ഇഞ്ചുറി ടെലാസ്ക അവിലസിന്റെ ഗോളിലൂടെ ഇന്റർ മയാമി സമനില പിടിച്ചത്. മത്സരത്തിൽ ആദ്യ പകുതിയിൽ മയാമിയുടെ ആദ്യ ഗോൾ നേടിയ ടോമസ് റെഡ് കാർഡ് കണ്ട് പുറത്തായിരുന്നു. 23ാം മിനിറ്റിലാണ് താരം ചുവപ്പ് കാർഡ് കണ്ട് മടങ്ങിയത്. ബാക്കിയുള്ള നിമിഷങ്ങളിൽ 10 പേരായിട്ടായിരുന്നു മയാമി പന്ത് തട്ടിയത്.