ഖാര്‍തൂം: വടക്കുകിഴക്കന്‍ ആഫ്രിക്കന്‍ രാജ്യമായ സുഡാനിലെ ഓംദുര്‍മാന്‍ നഗരത്തില്‍ ഉണ്ടായ സൈനിക വിമാനം തകര്‍ന്നുവീണ് മരിച്ചവരുടെ എണ്ണം 49 ആയി. കഴിഞ്ഞ രണ്ട് പതിറ്റാണ്ടിനിടെ രാജ്യത്തുണ്ടായ ഏറ്റവും വലിയ വിമാനാപകടങ്ങളിലൊന്നാണിത്. അപകടത്തില്‍ ഉന്നത സൈനിക ഉദ്യോഗസ്ഥരും സൈനികരും സാധാരണക്കാരും കൊല്ലപ്പെട്ടിട്ടുണ്ട്.

ചൊവ്വാഴ്ച ഓംദുര്‍മാനിലെ ജനസാന്ദ്രതയുള്ള പ്രദേശത്തിലൂടെ സഞ്ചരിക്കുന്നതിനിടെയാണ് വിമാനം തകര്‍ന്നുവീണത്. അപകടത്തില്‍ 10 പേര്‍ക്ക് പരുക്കേറ്റതായി എന്ന് സര്‍ക്കാര്‍ നിയന്ത്രണത്തിലുള്ള ഖാര്‍ത്തൂം മീഡിയ ഓഫീസ് അറിയിച്ചു.

തലസ്ഥാനമായ ഖാര്‍ത്തൂമില്‍ നിന്നും വെറും പത്തു കിലോമീറ്റര്‍ മാറിയാണ് ഓംദുര്‍മാന്‍ സ്ഥിതി ചെയ്യുന്നത്. ഓംദുര്‍മാന് വടക്കുള്ള വാദി സെയ്ദന വ്യോമതാവളത്തില്‍ നിന്ന് പറന്നുയരുന്നതിനിടെയാണ് വിമാനം തകര്‍ന്നുവീണതെന്ന് സൈന്യം പ്രസ്താവനയില്‍ അറിയിച്ചു.

A Sudanese military Antonov aircraft crashed in Omdurman, north of Khartoum, on Tuesday evening, killing the crew and several military personnel on board. Eyewitnesses said at least five civilians on the ground were also killed and dozens injured when debris from the plane struck… pic.twitter.com/PS733snFLg

— Sudan Tribune (@SudanTribune_EN) February 26, 2025

അപകടത്തില്‍ ഓംദുര്‍മാനിലെ കരാരി ജില്ലയിലെ നിരവധി വീടുകള്‍ക്ക് കേടുപാടുകള്‍ സംഭവിച്ചതായി മീഡിയ ഓഫീസ് അറിയിച്ചു. അപകടത്തില്‍ സായുധ സേനാംഗങ്ങളും സാധാരണക്കാരും കൊല്ലപ്പെട്ടതായി സൈന്യം നേരത്തെ പറഞ്ഞിരുന്നുവെങ്കിലും കണക്കുകള്‍ നല്‍കുകയോ അപകടകാരണം എന്താണെന്ന് വ്യക്തമാക്കുകയോ ചെയ്തിരുന്നില്ല. അപകടത്തില്‍ കൊല്ലപ്പെട്ടവരുടെ മൃതദേഹങ്ങള്‍ ഓംദുര്‍മാനിലെ നൗ ആശുപത്രിയിലേക്ക് മാറ്റിയതായി ആരോഗ്യ മന്ത്രാലയം അറിയിച്ചു.