ദുബൈ: ചാമ്പ്യന്‍സ് ട്രോഫിയില്‍ പാകിസ്താനെതിരായ മത്സരത്തിനു ശേഷം വിശ്രമത്തിലാണ് ഇന്ത്യന്‍ താരങ്ങള്‍. ഇന്ത്യയുടെ എല്ലാ മത്സരങ്ങളും ദുബൈയില്‍ നടക്കുന്നതു കൊണ്ടു തന്നെ താരങ്ങള്‍ക്ക് മറ്റു രാജ്യങ്ങളുടെ താരങ്ങളെപ്പോലെ ഓരോ മത്സരങ്ങള്‍ക്കായും ദുബൈയിലേക്കും പാകിസ്താനിലേക്കും സഞ്ചരിക്കേണ്ട ആവശ്യമില്ല. വിശ്രമ വേളയില്‍ ദുബൈ ഗോള്‍ഡ് സൂക്കിലേക്കെത്തുന്ന രോഹിത് ശര്‍മ്മയുടെ വീഡിയോ സമൂഹമാധ്യമങ്ങളില്‍ പ്രചരിക്കുകയാണ്. 

ദുബൈയിലെ ഗോള്‍ഡ് സൂക്കിന്റെ ഇടുങ്ങിയ വഴികളില്‍ 'രോഹിത്, രോഹിത്' എന്ന് ആളുകള്‍ വിളിച്ചുകൂവിക്കൊണ്ടിരുന്നു. ഇന്ത്യന്‍ നായകനെ ഒരു നോക്ക് കാണാനുള്ള പ്രതീക്ഷയില്‍ നൂറുകണക്കിന് ക്രിക്കറ്റ് പ്രേമികള്‍ പ്രദേശമാകെ തടിച്ചുകൂടി. തിരക്കേറിയ മാര്‍ക്കറ്റിലൂടെ രോഹിത് സഞ്ചരിക്കുമ്പോള്‍ അന്തരീക്ഷത്തില്‍ ആവേശം നിറഞ്ഞു.

ചാമ്പ്യന്‍സ് ട്രോഫിയില്‍ ഇന്ത്യയുടെ ആധിപത്യത്തിനിടെ രോഹിത് ശര്‍മ്മ ദുബൈയിലെ പ്രശസ്തമായ ഗോള്‍ഡ് സൂക്ക് സന്ദര്‍ശിക്കാന്‍ എത്തുമെന്ന അഭ്യൂഹം പരന്നതോടെ നിരവധി പേരാണ് ജോലിക്ക് അവധി നല്‍കി എത്തിയത്. ആവേശം നിറച്ച പ്രകടനങ്ങള്‍ക്കിടയിലും മൈതാനത്ത് ശാന്തനായ പെരുമാറ്റത്തിന് പേരുകേട്ട രോഹിത്, ലക്ഷ്യസ്ഥാനത്ത് എത്തുന്നതിന് മുമ്പ് ആളുകളെ കൈവീശിക്കാണിച്ച് ആള്‍ക്കൂട്ടത്തിലൂടെ കടന്നുപോയി.

അടുത്ത ഞായറാഴ്ച ന്യൂസിലന്‍ഡിനെതിരായ അവസാന ഗ്രൂപ്പ് മത്സരത്തിന് മുമ്പുള്ള പരിശീലന സെഷന്‍ ഷെഡ്യൂള്‍ ചെയ്തിട്ടില്ലാത്തതിനാല്‍ ഇന്ത്യന്‍ കളിക്കാര്‍ അവരുടെ വിശ്രമ സമയം പരമാവധി പ്രയോജനപ്പെടുത്തുകയാണ്. ചിലര്‍ ഹോട്ടലിലെ ജിമ്മിലും നീന്തല്‍ക്കുളത്തിലും സമയം ചെലവഴിച്ചപ്പോള്‍ മറ്റുള്ളവര്‍ ദുബൈ മാള്‍ സന്ദര്‍ശിച്ചു.

This is neither a street of Mumbai nor any city of India this is Dubai.🥶🙇

Unreal craze for Captain Rohit Sharma, there is such a huge crowd on the streets of Dubai just for get glimpse of Rohit Sharma yesterday night.🔥 pic.twitter.com/5SiJrisP9V

— 𝐑𝐮𝐬𝐡𝐢𝐢𝐢⁴⁵ (@rushiii_12) February 26, 2025

അതേസമയം, ദുബൈയിലെ ഒരു തെരുവ് ഭക്ഷണശാലയില്‍ ഇരിക്കുന്ന രോഹിത് ശര്‍മ്മയുടേയും കുല്‍ദീപ് യാദവിന്റേയും ഒരു വീഡിയോ വൈറലായതോടെ നഗരത്തിലെ ടീമിന്റെ സാന്നിധ്യത്തെ ചുറ്റിപ്പറ്റിയുള്ള ചര്‍ച്ചകള്‍ വര്‍ധിപ്പിച്ചിരിക്കുകയാണ്.

ഓസ്‌ട്രേലിയന്‍ പര്യടനത്തില്‍ നിന്ന് തിരിച്ചെത്തിയതിനുശേഷം, വൈറ്റ്‌ബോള്‍ ക്രിക്കറ്റില്‍ ഇന്ത്യയുടെ ആധിപത്യം തുടരുകയാണ്. ടി20 ഫോര്‍മാറ്റില്‍ ഇംഗ്ലണ്ടിനെ 4-1ന് പരാജയപ്പെടുത്തി, ഏകദിനങ്ങളില്‍ 3-0ന് വിജയിച്ചു. ദുബൈയിലെ ഇരട്ട വിജയങ്ങള്‍ ചാമ്പ്യന്‍സ് ട്രോഫിയിലെ ഫേവറിറ്റുകള്‍ എന്ന നിലയില്‍ ഇന്ത്യയുടെ സ്ഥാനം ശക്തിപ്പെടുത്തിയിട്ടുണ്ട്. സെമിഫൈനല്‍ അടുത്തുവരുമ്പോള്‍, രോഹിതും കൂട്ടരും തങ്ങളുടെ ആവേശം നിലനിര്‍ത്താനും ആഘോഷങ്ങള്‍ തുടരാനുമായിരിക്കും ശ്രമിക്കുക.

Hitman visits Dubai Gold Souk during break between matches