ദുബൈ: ഇന്ന് പുലർച്ചെ ജബൽ അലിയിലുണ്ടായ വാഹനാപകടത്തിൽ ട്രക്ക് ഡ്രൈവർ മരിച്ചു. ഇയാൾ ഓടിച്ച ട്രക്കിന് തീപിടിച്ച് മറ്റൊരു ട്രക്കുമായി കൂട്ടിയിടിച്ചായിരുന്നു അപകടം.

പാതയിൽ നിന്ന് തെന്നിമാറിയ ട്രക്ക് രണ്ടാമത്തെ ട്രക്കിലേക്ക് ഇടിച്ചുകയറുന്നതിന് മുമ്പ് തീപിടിച്ചതായി ദുബൈ പൊലിസ് പങ്കുവച്ച വീഡിയോയിൽ വ്യക്തമാകുന്നുണ്ട്. തീപിടിത്തത്തെ തുടർന്ന് ഡ്രൈവർക്ക് വാഹനത്തിൻ്റെ നിയന്ത്രണം നഷ്‌ടമാകുകയും തുടർന്ന് എതിർ പാതയിലേക്ക് മറിഞ്ഞ് എതിരെ വന്ന ട്രക്കുമായി ഇടിക്കുകയുമായിരുന്നു.

തീപിടിച്ച ട്രക്കിൻ്റെ ഡ്രൈവർ സംഭവസ്‌ഥലത്ത് തന്നെ മരിച്ചു. ഗുരുതരമായി പരുക്കേറ്റ രണ്ടാമത്തെ ട്രക്കിൻ്റെ ഡ്രൈവറെ അടുത്തുള്ള ആശുപത്രിയിൽ പ്രവേശിപ്പിച്ചതായി ദുബൈ പൊലിസ് ജനറൽ ഡിപാർട്ട്മെൻ്റ് ഓഫ് ട്രാഫിക് ഡയറക്ട‌ർ മേജർ ജനറൽ സെയ്ഫ് മുഹൈർ അൽ മസ്റൂയി വ്യക്തമാക്കി.

ഗുരുതരമായ അപകടങ്ങൾക്ക് കാരണമാകുന്ന മെക്കാനിക്കൽ തകരാറുകൾ പരിഹരിക്കാൻ വാഹനങ്ങൾ കർശനമായ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തണമെന്ന് മേജർ ജനറൽ അൽ മസ്‌റൂയി ഡ്രൈവർമാരോട് അഭ്യർഥിച്ചു. അപകട സാധ്യത കുറക്കാനും ഡ്രൈവർമാരെയും പൊതുജനങ്ങളെയും സംരക്ഷിക്കാനും ബ്രേക്കുകൾ, ടയറുകൾ, ഇന്ധന ലൈനുകൾ എന്നിങ്ങനെയുള്ള പ്രധാന സംവിധാനങ്ങൾ ശരിയായി പ്രവർത്തിക്കുന്നുണ്ടെന്ന് ഉറപ്പാക്കേണ്ടത് അത്യാവശ്യമാണ്.

A truck driver lost his life in a fatal accident on Jebel Ali road in Dubai after his vehicle caught fire and collided with another truck, resulting in a devastating crash.