അബൂദബി: മുസഫ മേഖലയിലെ ജനങ്ങൾ കൂടുതലായി താമസിക്കുന്ന മുഹമ്മദ് ബിൻ സായിദ് സിറ്റിയിൽ അബൂദബി നഗര-ഗതാഗത വകുപ്പ് 33 പുതിയ പാർക്കുകൾ തുറന്നു. 

അബൂദബി നിവാസികളുടെ ജീവിതനിലവാരം ഉയർത്താൻ ലക്ഷ്യമിട്ടാണ് വിനോദ ഇടങ്ങളോടുകൂടിയ പുതിയ പാർക്കുകൾ ആരംഭിച്ചിരിക്കുന്നത്. കുട്ടികളുടെ കളിസ്ഥലങ്ങൾ, പിക്നിക് മേഖലകൾ, തണലിന് കീഴെയുള്ള ഇരിപ്പിടങ്ങൾ, ജോഗിങ് ട്രാക്കുകൾ, ഫിറ്റ്നസ് സോണുകൾ എന്നിവയും പാർക്കിൽ ഒരുക്കിയിട്ടുണ്ട്. കായിക പ്രേമികൾക്കായി പാർക്കിൽ ബാസ്കറ്റ്ബാൾ, വോളിബാൾ, ബാഡ്‌മിൻ്റൺ കോർട്ടുകളും ഒരുക്കിയിട്ടുണ്ട്. 

1200 ദിർഹം ചെലവഴിച്ചു നിർമിക്കുന്ന സമൂഹ വികസന പദ്ധതികളുടെ ഭാഗമായിട്ടാണ് പാർക്കുകളുടെ നിർമാണം. 2025ഓടെ 277 പുതിയ പാർക്കുകൾ നിർമിക്കുമെന്ന് നേരത്തേ‌ അധികൃതർ അറിയിച്ചിരുന്നു. ഇതിൽ അബൂദബിയിൽ 180ഉം, അൽഐനിൽ 80ഉം അൽ ദഫ്റയിൽ 17ഉം പാർക്കുകളാണ് പുതുതായി വരുന്നത്. കാൽനട പാതകൾ, സൈക്ലിങ് പാതകൾ, പള്ളികൾ, പാർക്കുകൾ, പച്ചപ്പുകൾ, സൗന്ദര്യവത്കരണ ജോലികൾ, കായികയിടങ്ങൾ, ക്ലിനിക്കുകൾ തുടങ്ങിയവയാണ് നിർമിക്കുന്നത്. 

അബൂദബി കോർണിഷ് ഹെറിറ്റേജ് പാർക്ക്, ഖലീജ് അൽ അറബ് സ്ട്രീറ്റ് ഓഫിസേഴ്‌സ് ക്ലബ് പാർക്ക്, ഡോൾഫിൻ പാർക്ക്, അൽ ബതീൻ പാർക്ക്, അൽസാദ സ്ട്രീറ്റ് അൽ സഫറാന, ടൂറിസ്റ്റ് ക്ലബ് ഏരിയ അൽ ബരീദ് പാർക്ക്, അൽസജി പാർക്ക്, അൽ മൊണ്ടാസ ഗാർഡൻസ് നമ്പർ 1,2,4,5 എന്നിവിടങ്ങളിലാണ് പ്രാർഥന സൗകര്യമുള്ളത്.

ലോകോത്തര നിലവാരമുള്ള ജീവിതസാഹചര്യമൊരുക്കുകയും ആരോഗ്യജീവിതത്തെ പ്രോത്സാഹിപ്പിക്കുകയും ചെയ്യുന്നതിനായി നേരത്തേതന്നെ അബൂദബിയിൽ നിരവധി വിനോദ കേന്ദ്രങ്ങൾ തുറന്നിരുന്നു. 46 പോക്കറ്റ് പാർക്കുകളും, 94 കളിയിടങ്ങളും ജനങ്ങൾക്കായി ഒരുക്കി നൽകിയിട്ടുണ്ട്. അടിസ്ഥാന സൗകര്യ വികസനം, റോഡ് സുരക്ഷ, താമസക്കാർക്കായി വിനോദ സൗകര്യങ്ങൾ തുടങ്ങി നിരവധി പദ്ധതികൾ നടപ്പാക്കിയിട്ടുണ്ട്.

Abu Dhabi has inaugurated 33 new parks as part of its efforts to enhance the quality of life for residents, promoting a healthier and more sustainable lifestyle.