റിയാദ്: സഊദി പ്രോ ലീഗിൽ അൽ നസറിന് തോൽവി. അൽ ഒരൊമ്പ ഒന്നിനെതിരെ രണ്ട് ഗോളുകൾക്കാണ് അൽ നസറിനെ പരാജയപ്പെടുത്തിയത്. സീസണിലെ സൗദി വമ്പൻമാരുടെ നാലാം തോൽവിയായിരുന്നു ഇത്. മത്സരം പരാജയപ്പെട്ടെങ്കിലും അൽ നസർ നായകൻ ക്രിസ്റ്റ്യാനോ റൊണാൾഡോ തന്റെ ഫുട്ബോൾ കരിയറിൽ ഒരു തകർപ്പൻ നേട്ടമാണ് സ്വന്തമാക്കിയത്. 

അൽ നസറിനൊപ്പം 100 മത്സരങ്ങൾ പൂർത്തിയാക്കാനാണ് റൊണാൾഡോക്ക്‌ സാധിച്ചത്. ഇതോടെ നാല് വ്യത്യസ്ത ക്ലബ്ബുകൾക്ക് വേണ്ടി 100 മത്സരങ്ങൾ പൂർത്തിയാക്കുന്ന താരമായി മാറാനും റൊണാൾഡോക്ക് സാധിച്ചു. മാഞ്ചസ്റ്റർ യുണൈറ്റഡ്, റയൽ മാഡ്രിഡ്,  യുവന്റസ് എന്നീ ക്ലബ്ബുകൾക്ക് വേണ്ടിയായിരുന്നു ഇതിനു മുമ്പ് റൊണാൾഡോ 100 മത്സരങ്ങൾ കളിച്ചിട്ടുള്ളത്. 

2023ൽ മാഞ്ചസ്റ്റർ യുണൈറ്ററിൽ നിന്നുമായിരുന്നു റൊണാൾഡോ സഊദിയിലേക്ക് എത്തിയത്. റൊണാൾഡോയുടെ വരവിന് പിന്നാലെ ലോക ഫുട്ബോളിൽ സഊദി പ്രൊ ലീഗിന് കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പിന്നാലെ യൂറോപ്പ്യൻ അധ്യായങ്ങൾക്ക് വിരാമമിട്ടുകൊണ്ട് പല സൂപ്പർതാരങ്ങളും സഊദിയുടെ മണ്ണിൽ എത്തിയിരുന്നു. കരിം ബെൻസിമ, സാദിയോ മാനെ, റിയാദ് മെഹറസ്, നെയ്മർ തുടങ്ങിയ മികച്ച താരങ്ങളായിരുന്നു സഊദിയിലേക്ക് കൂടുമാറിയത്. അൽ നസറിന് വേണ്ടി ഇക്കാലയളവിലെല്ലാം തകർപ്പൻ ഫോമിലാണ് റൊണാൾഡോ കളിച്ചുകൊണ്ടിരിക്കുന്നത്. 100 മത്സരങ്ങളിൽ നിന്നും 89 ഗോളുകളും 19 അസിസ്റ്റുകളുമാണ് റൊണാൾഡോ സ്വന്തമാക്കിയിട്ടുള്ളത്. 

അതേസമയം മത്സരത്തിൽ അൽ ഒറോമക്ക്‌ വേണ്ടി ഒമർ അൽ സോമയും ജൊഹാൻ ബർഗ് ഗുണ്ട്മാഡ്‌സണുമാണ് ഗോളുകൾ നേടിയത്. നവാഫ് ബൗഷലിലൂടെയാണ് അൽ നസർ ലക്ഷ്യം കണ്ടത്. നിലവിൽ സഊദി പ്രൊ ലീഗിൽ മൂന്നാം സ്ഥാനത്താണ് റൊണാൾഡോയും സംഘവും സംഘവും. 24 മത്സരങ്ങളിൽ നിന്നും 14 ജയവും അഞ്ചു സമനിലയും നാല് തോൽവിയും അടക്കം 47 പോയിന്റാണ് അൽ നസറിന്റെ കൈവശമുള്ളത്. എഎഫ്സി ചാമ്പ്യൻസ് ലീഗിൽ മാർച്ച് മൂന്നിന് എസ്റ്റെഗ്ലാൽ എഫ്‌സിക്കെതിരെയാണ് അൽ നസറിന്റെ അടുത്ത മത്സരം. 

Cristaino Ronaldo Compleated 100 Matches With Four Diffrent Clubs in Football