ദുബൈ: ഗാര്‍ഹിക തൊഴിലാളികളെ റിക്രൂട്ട് ചെയ്യുന്നതിനായി ലൈസന്‍സില്ലാത്ത ഏജന്‍സികളുമായി ഇടപെടുന്നതിനെതിരെയും തൊഴില്‍ സേവനങ്ങള്‍ വാഗ്ദാനം ചെയ്യുന്ന യോഗ്യതയില്ലാത്ത വ്യക്തികളുമായി ഇടപഴകുന്നതിനെതിരെയും മാനവ വിഭവശേഷി, സ്വദേശിവല്‍ക്കരണ മന്ത്രാലയം താമസക്കാര്‍ക്ക് (പൗരന്മാര്‍ക്കും പ്രവാസികള്‍ക്കും) മുന്നറിയിപ്പ് നല്‍കി.

വീട്ടുജോലിക്കാരുടെ കുറവും റമദാനില്‍ അവരുടെ നിയമനത്തിനുള്ള വിലയിലെ കുത്തനെയുള്ള വര്‍ധനവും കണക്കിലെടുത്ത്, തൊഴില്‍ വിപണിയെ നിയന്ത്രിക്കുന്നതില്‍ ഗാര്‍ഹിക തൊഴിലാളികള്‍ക്കുള്ള താല്‍ക്കാലിക തൊഴില്‍ സേവനങ്ങള്‍ ഒരു പ്രധാന സ്തംഭമാണെന്ന് മന്ത്രാലയം വ്യക്തമാക്കി. അംഗീകൃത സേവന കേന്ദ്രങ്ങള്‍ വഴി രജിസ്റ്റര്‍ ചെയ്ത ഗാര്‍ഹിക തൊഴിലാളികളെ മണിക്കൂര്‍, ദിവസേന അല്ലെങ്കില്‍ ആഴ്ചതോറുമുള്ള തൊഴിലുടമയുടെ ആവശ്യങ്ങള്‍ നിറവേറ്റുന്നതിനായി നിയമിക്കാന്‍, ഈ സേവനങ്ങള്‍ അനുവദിക്കുന്നു.

നിയമിതരായ ഗാര്‍ഹിക തൊഴിലാളികള്‍ സമ്മതിച്ച വ്യവസ്ഥകളോ സവിശേഷതകളോ നിബന്ധനകളോ പാലിക്കുന്നില്ലെങ്കില്‍ ഏജന്‍സികളുമായി ബന്ധപ്പെട്ടാല്‍ അവരുടെ പണം തിരികെ ലഭിക്കുമെന്ന് മന്ത്രാലയം പറഞ്ഞു.

എല്ലാ രാജ്യക്കാരായ വീട്ടുജോലിക്കാര്‍ക്കും MOHRE ശമ്പള പരിധി നിശ്ചയിച്ചിരിക്കുന്നത് താഴെ പറയുന്ന രീതിയിലാണ്:

• ഒരു ദിവസം നാല് മണിക്കൂറിന് 120 ദിര്‍ഹം.
• ഒരു ദിവസം എട്ട് മണിക്കൂറിന് 200 ദിര്‍ഹം.
• ഏഴ് ദിവസത്തേക്ക് 1,120 ദിര്‍ഹം.
• 30 ദിവസത്തേക്ക് 3,500 ദിര്‍ഹം.
• ആറ് മാസത്തെ കരാറിന് പ്രതിമാസം 3,250 ദിര്‍ഹം
• 12 മാസത്തെ കരാറിന് പ്രതിമാസം 3,000 ദിര്‍ഹം.

യുഎഇയിലുടനീളമുള്ള ഗാര്‍ഹിക തൊഴിലാളി റിക്രൂട്ട്‌മെന്റ് ഏജന്‍സികള്‍ അമിത വില ആവശ്യപ്പെടുന്നതായി കഴിഞ്ഞ ഒരാഴ്ചയ്ക്കിടെ നൂറുകണക്കിന് പരാതികള്‍ ലഭിച്ചതായി മന്ത്രാലയം പറഞ്ഞു. റമദാന്‍ അടുക്കുമ്പോള്‍, ഉയര്‍ന്ന പ്രവര്‍ത്തനച്ചെലവും റമദാനിനുശേഷം മിച്ചമുള്ള തൊഴിലാളികളെ ഏജന്‍സികള്‍ പിരിച്ചുവിടുകയും ചെയ്യുന്നതിനാല്‍ റമദാനില്‍ പാചകക്കാര്‍ക്കുള്ള ഡിമാന്‍ഡ് കുത്തനെ വര്‍ധിച്ചിരിക്കുകയാണ്.

ചില ഏജന്‍സികള്‍ പാചകക്കാരുടെ താല്‍ക്കാലിക കരാര്‍ ചെലവ് പ്രതിമാസം 4,500 മുതല്‍ 5,000 ദിര്‍ഹം വരെ വര്‍ധിപ്പിച്ചിട്ടുണ്ട്. റിക്രൂട്ട്‌മെന്റ് ഏജന്റുമാരും സര്‍വീസ് പ്രോസസ്സിംഗ് ഓഫീസുകളും ഉള്‍പ്പെടെയുള്ള വ്യവസായ വിദഗ്ധര്‍ പാചകക്കാരുടെ താല്‍ക്കാലിക കരാറുകളിലെ ശമ്പളത്തിലെ വര്‍ധനവ് സ്ഥിരീകരിച്ചു.

പാചകക്കാരുടെ ആവശ്യം ലഭ്യമായതിനേക്കാള്‍ അഞ്ച് മുതല്‍ ആറ് മടങ്ങ് വരെ വര്‍ധിച്ചു. ഗാര്‍ഹിക തൊഴിലാളികളുടെ കൂട്ടത്തില്‍ ഏറ്റവും ഡിമാന്‍ഡ് ഉള്ള വിഭാഗവും ഇവര്‍ തന്നെയാണ്. വിതരണവും ഡിമാന്‍ഡും തമ്മിലുള്ള അസന്തുലിതാവസ്ഥ ശമ്പളത്തിലെ ഗണ്യമായ വര്‍ധനവിന് കാരണമായിട്ടുണ്ട്. ഇത് റമദാനില്‍ ഗാര്‍ഹിക തൊഴിലാളികളുടെ സഹായം തേടുന്ന കുടുംബങ്ങള്‍ക്ക് കനത്ത പ്രതിസന്ധി സൃഷ്ടിച്ചിരിക്കുകയാണ്.