2021ലാണ് ലയണൽ മെസി ബാഴ്സലോണക്കൊപ്പമുള്ള നീണ്ട കരിയർ അവസാനിപ്പിച്ച് ഫ്രഞ്ച് ക്ലബ്‌ പാരീസ് സെയ്ന്റ് ജെർമെയ്നിലേക്ക് ചേക്കേറിയത്. രണ്ട് വർഷമാണ്‌ മെസി പാരീസിൽ കളിച്ചത്. ഇപ്പോൾ പിഎസ്ജിക്കൊപ്പം കളിച്ചപ്പോഴുള്ള തന്റെ അനുഭവം പങ്കുവെച്ചിരിക്കുകയാണ് മെസി. ഫ്രഞ്ച് ക്ലബിനൊപ്പമുള്ള തന്റെ ജീവിതം വളരെ ബുദ്ധിമുട്ട് നിറഞ്ഞതാണെന്നാണ് മെസി പറഞ്ഞത്. 

ഇന്റർ മയാമിയിലേക്ക് കളിക്കാൻ പോയത് ഒരു അവസരമായിരുന്നു, ബാഴ്സലോണ വിടേണ്ടി വന്ന സമയങ്ങളിൽ എനിക്ക് എടുക്കേണ്ടി വന്ന തീരുമാനങ്ങളിൽ ഒന്നായിരുന്നു പാരീസിൽ ചേരുക എന്നത്. ഇത് ഫുട്ബോളിൽ എനിക്ക് ആസ്വദിക്കാൻ സാധിക്കാതെ പോയ രണ്ട് വർഷങ്ങൾ ആയിരുന്നു. പാരീസിൽ പരിശീലനത്തിലും മത്സരങ്ങളിലും ഞാൻ ഓരോ ദിവസവും സന്തുഷ്ടനായിരുന്നില്ല. ഇതിനോട് പൊരുത്തപ്പെടാൻ എനിക്ക് ബുദ്ധിമുട്ടായിരുന്നു,' മെസി ആപ്പിൾ മ്യൂസിക്കിന് നൽകിയ അഭിമുഖത്തിൽ പറഞ്ഞു. 

പിഎസ്ജിക്ക്‌ വേണ്ടി രണ്ട് സീസണുകളിലായി 32 ഗോളുകളും 35 അസിസ്റ്റുകളുമാണ് മെസി നേടിയത്. ടീമിനൊപ്പം രണ്ട് ലീഗ് കിരീടങ്ങളും മെസി സ്വന്തമാക്കിയിരുന്നു. 2023ലാണ് മെസി പാരീസ് വിട്ട് മേജർ ലീഗിലേക്ക് പോയത്. നിലവിൽ ഇന്റർ മയാമിക്ക് വേണ്ടി മിന്നും പ്രകടനമാണ് മെസി നടത്തിക്കൊണ്ടിരിക്കുന്നത്. 36 ഗോളുകളും 20 അസിസ്റ്റുകളും ആണ് മെസി ഇന്റർ മയാമിക്ക് വേണ്ടി നേടിയത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി. ഈ വർഷം ഡിസംബർ വരെയാണ് ഇന്റർ മയാമിക്കൊപ്പമുള്ള മെസിയുടെ കരാർ അവസാനിക്കുന്നത്.

അതേസമയം മേജർ ലീഗ് സോക്കറിലെ പുതിയ സീസണിലെ ആദ്യ മത്സരത്തിൽ ഇന്റർ മയാമി സമനിലയിൽ കുടുങ്ങിയിരുന്നു.  ന്യൂയോർക്ക് സിറ്റിയാണ് മെസിയെയും സംഘത്തിന്റെയും സമനിലയിൽ കുടുക്കിയത്. മത്സരത്തിൽ ഇരു ടീമികളും രണ്ട് ഗോളുകൾ വീതം നേടി പോയിന്റുകൾ പങ്കുവെക്കുകയായിരുന്നു. കോൺകകാഫ് കപ്പിൽ സ്പോർട്ടിങ് എഫ്സിക്കെതിരായ മത്സരത്തിൽ 3-1ന്റെ തകർപ്പൻ വിജയമാണ് ഇന്റർ മയാമി സ്വന്തമാക്കിയത്. ഇതോടെ രണ്ട് പാദങ്ങളിലുമായി 4-1 എന്ന അഗ്രിഗേറ്റ് സ്‌കോറിൽ അടുത്ത റൗണ്ടിലേക്ക് മുന്നേറാനും മെസിക്കും സംഘത്തിനും സാധിച്ചു.