കണ്ണൂർ: ജീവിതശൈലീരോഗങ്ങൾ നിയന്ത്രിക്കുന്നതിന്റെ ഭാഗമായി നടപ്പാക്കിയ ‘അൽപം ശ്രദ്ധ ആരോഗ്യം ഉറപ്പ്’ കാംപയിന്റെ രണ്ടാം ഘട്ടത്തിൽ 1,07, 99, 876 പേരെ വീടുകളിലെത്തി സ്‌ക്രീനിങ് നടത്തി. കഴിഞ്ഞവർഷം ജൂൺ മുതൽ ഈ വർഷം ഫെബ്രുവരി 23 വരെ നടത്തിയ കാംപയിനിലാണ് സ്‌ക്രീനിങ് പൂർത്തിയാക്കിയത്. ഇതിൽ 48.12 ലക്ഷം പേർക്ക് രക്താദിമർദവും പ്രമേഹവും വരാനുള്ള സാധ്യത കൂടുതലാണെന്ന് കണ്ടെത്തി. 

മുപ്പത് കഴിഞ്ഞവരിലാണ് സക്രീനിങ് നടത്തിയത്. ഇതിൽ 2,16, 622 പേരിൽ കാൻസർ രോഗ സാധ്യതയും കണ്ടെത്തിയിട്ടുണ്ട്. 4,07, 955 പേർക്ക് ശ്വാസകോശ സംബന്ധ രോഗങ്ങൾ വരാനുള്ള സാധ്യതയും സ്ക്രിനീങിലൂടെ കണ്ടെത്തി. കുഷ്ഠരോഗം, മാനസികരോഗം, കാഴ്ച പരിമിതി, കേൾവിക്കുറവ് തുടങ്ങിയവയും പരിശോധനയ്ക്ക് വിധേയമാക്കിയിട്ടുണ്ട്.  കാൻസർരോഗ സാധ്യത കൂടുതലും കണ്ടെത്തിയത് സ്ത്രീകളിലാണ്. കഴിഞ്ഞവർഷം ഓഗസ്റ്റിൽ നടത്തിയ സർവേ പ്രകാരം ഒരുലക്ഷം സ്ത്രീകളിൽ 40 മുതൽ 45വരെ പേർ അർബുദ ബാധിതരാവുന്നുവെന്ന് കണ്ടെത്തിയിട്ടുണ്ട്. സാധാരണ 40ന് മുകളിൽ പ്രായമുള്ള സ്ത്രീകളിലാണ് സ്തനാർബുദം കൂടുതലായി കാണപ്പെടുന്നത്. 

അപൂർവമായി 20 മുതൽ 40 വരെയുള്ള പ്രായക്കാർക്കും ഗർഭിണികൾക്കും അർബുദം ബാധിക്കാം. 
കേരളത്തിലെ 12 ജില്ലകളിൽ നടത്തിയ ഒരു സർവേയിലെ റിപ്പോർട്ടാണിത്. 30 വയസും കൂടുതലുമുള്ള 7,06,275 സ്ത്രീകളെ ഉൾപ്പെടുത്തി നടത്തിയ സർവേയിൽ 12,093 സ്ത്രീകൾക്ക് 1.71 ശതമാനവും സ്തനാർബുദ സാധ്യതയുണ്ടെന്ന് കണ്ടെത്തി. ഈ സർവേയിലൂടെ രോഗസാധ്യത കണ്ടെത്തുന്നവർക്ക് രോഗ നിർണയത്തിനും ചികിത്സയ്ക്കുമായി കാൻസർ നിയന്ത്രണ പരിപാടിയുടെ പ്രവർത്തനങ്ങൾക്ക് കാൻസർ കെയർ സ്‌ക്രീനിങ് ഡാഷ്ബോർഡ് പോർട്ടൽ സജ്ജമാക്കിയിട്ടുണ്ട്. ഇതിന്റെ ഭാഗമായി എല്ലാ ജില്ലകളിലും സ്‌ക്രീനിങ് നടത്തുണ്ട്.