ദുബൈ: ദുബൈ ഭരണാധികാരി ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന് എമിറേറ്റ്‌സ് ഹോളി ഖുര്‍ആന്‍ പുരസ്‌കാരം സമ്മാനിച്ചു. ഖുര്‍ആന്‍ പഠനത്തിനായി നല്‍കിയ സംഭാവനകള്‍ പരിഗണിച്ചാണ് യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ അദ്ദേഹത്തിന് പുരസ്‌കാരം സമ്മാനിച്ചത്.

യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം വിശുദ്ധ ഖുര്‍ആന്‍ പാരായണത്തിലും പ്രചാരണത്തിലും പ്രാദേശികമായും ആഗോളമായും നല്‍കിയ സമഗ്ര സംഭാവനകളാണ് അദ്ദേഹത്തെ അവാര്‍ഡിന് അര്‍ഹനാക്കിയത്.

എമിറേറ്റ്‌സിന്റെ സ്ഥാപക പിതാവ് മറ്റ് ഭരണാധികാരികളുമായി രാജ്യത്തിന്റെ രൂപീകരണത്തെക്കുറിച്ച് ചര്‍ച്ച ചെയ്തിരുന്ന ചരിത്രവേദിയായ അല്‍ ഖവാനീജ് ഫാമില്‍ നടന്ന ഇഫ്താറില്‍ ഏഴ് എമിറേറ്റുകളിലെയും നേതാക്കള്‍ യുഎഇ പ്രസിഡന്റിനൊപ്പം പങ്കെടുത്തു. യുഎഇക്ക് വേണ്ടി ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം നല്‍കിയ സേവനങ്ങളെയും സംഭാവനകളെയും പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ പ്രശംസിച്ചു.

The first Emirates Holy Quran Award was presented to the Ruler of Dubai