കൊച്ചി: രണ്ട് ദിവസമായി സ്വർണത്തിന് വ്യത്യസ്ത വില ഈടാക്കുന്നതുമൂലം  ഉപഭോക്താക്കൾ ആശയക്കുഴപ്പത്തിൽ. ഓൾ കേരള ഗോൾഡ് ആൻഡ് സിൽവർ മർച്ചൻ്റ്സ് അസോസിയേഷൻ രണ്ടുവിഭാഗമായി പിരിഞ്ഞതോടെയാണ് രണ്ടുവിലയും പ്രഖ്യാപിച്ചത്. ഇന്നലെ ഒരുവിഭാഗം പവന് 360 രൂപ കുറച്ചപ്പോൾ  മറുവിഭാഗം 80രൂപ കൂട്ടിയാണ് വില പ്രഖ്യാപിച്ചത്. ഇതനുസരിച്ച്  പവന് 64480, 64160 എന്നീ വിലകളാണ് വിവിധ ജ്വല്ലറികൾ ഈടാക്കിയത്.

സംഘടനാപ്രസിഡൻ്റ് ബി.ഗോവിന്ദൻ്റെ നേതൃത്വത്തിൽ ഒരു വിഭാഗം ഉടലെടുത്തതോടെയാണ്  രണ്ടുവിഭാഗവും രണ്ട് വിലയും പ്രഖ്യാപിച്ചത്. ഒരു വിഭാഗം ബോംബെ വിപണിയിലെ റേറ്റ് പ്രകാരവും മറുവിഭാഗം സ്വർണം ഇറക്കുമതിചെയ്യുന്ന ബാങ്കുകളുടെ നിരക്ക് പ്രകാരവുമാണ് വില നിശ്ചയിക്കുന്നത്. എന്നാൽ  ഏകീകൃത വില നിർണയ മാനദണ്ഡം നടപ്പാക്കുന്നതിനുള്ള ചർച്ചകൾ പുരോഗമിക്കുകയാണ്. 

സ്വർണത്തിൻ്റെ പരിശുദ്ധി അടിസ്ഥാനമാക്കിയുള്ള 93ശതമാനം എന്ന മാനദണ്ഡപ്രകാരമാണ് ഇന്നലെ വില നിശ്ചയിച്ചതെന്നും ഏകീകൃത വില നിർണയത്തെ സ്വാഗതം ചെയ്യുന്നതായും  ഓൾ കേരള ഗോൾഡ് ആൻഡ് സിൽവർ മർച്ചൻ്റ്സ് അസോസിയേഷൻ സംസ്ഥാന ജനറൽസെക്രട്ടറി എസ്. അബ്ദുൽ നാസർ പറഞ്ഞു.   അതേസമയം വ്യത്യസ്ത വില ഈടാക്കുന്നത് ഉപഭോക്താക്കളെ വലയ്ക്കുന്നുണ്ട്. ചില ജ്വല്ലറികളിൽ നിന്ന് കുറഞ്ഞവിലയ്ക്ക് സ്വർണം വാങ്ങുമ്പോൾ മറ്റിടത്ത് ഉയർന്ന വില ഈടാക്കുന്നു എന്ന പരാതിയാണ് ഉയർന്നിരിക്കുന്നത്.