വാഷിംഗ്ടൺ: ഇന്ത്യയുടെ വ്യാപാര നയങ്ങളെ വീണ്ടും കടുത്ത ഭാഷയിൽ വിമർശിച്ച് യുഎസ് പ്രസിഡന്റ് ഡൊണാൾഡ് ട്രംപ്. ഇന്ത്യ ഏറ്റവും ഉയർന്ന താരിഫ് ഏർപ്പെടുത്തിയ രാജ്യങ്ങളിൽ ഒന്നാണെന്നും ഇതിന് മറുപടി നൽകുമെന്ന് യുഎസ് ഭരണകൂടം വ്യക്തമാക്കിയിട്ടുണ്ട്.

ഇന്ത്യയടക്കമുള്ള രാജ്യങ്ങൾക്കെതിരെ ഏപ്രിൽ 2 മുതൽ പുതുക്കിയ തീരുവകൾ ചുമത്തുമെന്ന വാഗ്ദാനം നേരത്തെ ട്രംപ് നടത്തിയിരുന്നു. ഇതിൽ ഏറ്റവും വലിയ മാറ്റങ്ങൾ ഇന്ത്യ നേരിടേണ്ടി വരുമെന്ന് അദ്ദേഹം സൂചിപ്പിച്ചു. ഇതിന്റെ പശ്ചാത്തലത്തിൽ, ഇരു രാജ്യങ്ങളും തമ്മിലുള്ള വ്യാപാര നയങ്ങളെക്കുറിച്ച് ചർച്ച നടത്താൻ ഇന്ത്യൻ വാണിജ്യ മന്ത്രി പീയൂഷ് ഗോയൽ വാഷിംഗ്ടണിൽ എത്തിയപ്പോഴാണ് ട്രംപിന്റെ പുതിയ വിമർശനം ഉയർന്നത്.

യുഎസിന്റെ ഇറക്കുമതികളുമായി താരതമ്യപ്പെടുത്തുമ്പോൾ ഇന്ത്യ ഉയർന്ന താരിഫ് ഈടാക്കുന്നുവെന്നതും അമേരിക്കയ്ക്ക് തീരുവ പരിഷ്‌കരണം അനിവാര്യമാണെന്നതുമാണ് ട്രംപിന്റെ വാദം. "കണ്ണിനു പകരം കണ്ണ്" എന്ന നിലപാടിലാണ് യുഎസ് സമീപനം സ്വീകരിക്കുന്നതെന്ന് അദ്ദേഹം വ്യക്തമാക്കി. ഈ നടപടികളിലൂടെ ഏറ്റവും വലിയ സാമ്പത്തിക പ്രത്യാഘാതം ഇന്ത്യക്കും തായ്‌ലൻഡിനുമാവുമെന്നും റിപ്പോർട്ടുകൾ പറയുന്നു.

അമേരിക്കൻ ഉൽപ്പന്നങ്ങൾക്കെതിരെ ഏറ്റവും ഉയർന്ന തീരുവ ചുമത്തുന്ന രാജ്യങ്ങളിൽ ഇന്ത്യയും തായ്‌ലൻഡും ഉൾപ്പെടുന്നു. നിലവിൽ ഇന്ത്യ യുഎസ് ഉൽപ്പന്നങ്ങൾക്ക് 10% മുതൽ കൂടുതലാണ് തീരുവ ഈടാക്കുന്നത്, അതേസമയം അമേരിക്കൻ നിരക്കുകൾ താരതമ്യേന കുറവാണ്. ഈ അസമത്വം പരിഹരിക്കാനായി യുഎസ് ശക്തമായ നടപടികൾ സ്വീകരിച്ചാൽ ഇന്ത്യയ്ക്ക് 4-6% വരെ അധിക തീരുവ നൽകേണ്ടി വരും.

വ്യാപാര സംഘർഷങ്ങൾക്കിടയിൽ ഇന്ത്യയുടെ നടപടി

അമേരിക്കയുമായി വ്യാപാര സംഘർഷം ലഘൂകരിക്കാൻ ഇന്ത്യ ഇതിനകം നിരവധി നിർണായക നടപടികൾ സ്വീകരിച്ചിട്ടുണ്ട്. മോട്ടോർസൈക്കിളുകൾ, വിസ്‌കി എന്നിവയുൾപ്പെടെ യുഎസ് ഉൽപ്പന്നങ്ങളുടെ തീരുവ ഇന്ത്യ കുറച്ചിട്ടുണ്ട്. എന്നാൽ, ഈ ഇളവുകൾ യുഎസ് ഭരണകൂടത്തിന് തൃപ്തികരമോ എന്ന കാര്യത്തിൽ അനിശ്ചിതത്വം തുടരുകയാണ്.