ഡമസ്കസ്: സിറിയയിൽ പുതിയ സർക്കാരിന്റെ സൈന്യവും പുറത്താക്കപ്പെട്ട പ്രസിഡന്റ് ബഷാർ അൽ അസദിന്റെ അനുകൂലികളും തമ്മിൽ രൂക്ഷമായ ഏറ്റുമുട്ടലുകൾ തുടരുന്നു. ബ്രിട്ടൻ ആസ്ഥാനമായ സിറിയൻ ഒബ്സർവേറ്ററി ഫോർ ഹ്യൂമൻ റൈറ്റ്‌സിന്റെ കണക്കനുസരിച്ച് സംഘർഷങ്ങളിൽ 200-ലധികം പേർ കൊല്ലപ്പെട്ടതായാണ് റിപ്പോർട്ട്. ഡമസ്കസ്, ടാർട്ടസ്, ലറ്റാകിയ ന​ഗരങ്ങൾ കേന്ദ്രീകരിച്ചായിരുന്നു ആക്രമം. ലറ്റാകിയ ന​ഗരത്തിൽ നിരോധനാജ്ഞ ഏർപ്പെടുത്തിയിട്ടുണ്ട്.

 കഴിഞ്ഞ ഡിസംബർ മാസത്തിൽ അസദിന്റെ സർക്കാരിനെ അട്ടിമറിച്ച ശേഷം നടന്ന ഏറ്റവും വലിയ അക്രമങ്ങളിലൊന്നാണ് ഇപ്പോഴത്തെ ഏറ്റുമുട്ടലുകൾ. ഹയാത്ത് തഹ്‌രിർ അൽ ഷാം (എച്ച്ടിഎസ്)  ഉൾപ്പെടെയുള്ള വിമത ഗ്രൂപ്പുകൾ പുതിയ സർക്കാരിനെ പിന്തുണക്കുന്നതിനാൽ, അസദ് അനുകൂലികൾക്ക് നേരെ നിരവധി ആക്രമണങ്ങൾ നടന്നു.

വ്യാഴാഴ്ചയും വെള്ളിയാഴ്ചയും തീരദേശ പട്ടണങ്ങളിൽ ആക്രമണങ്ങൾ തുടരുകയും നിരവധി ഗ്രാമങ്ങൾ ആക്രമിക്കപ്പെടുകയും ചെയ്തു. ജബ്ലെയ്ക്ക് സമീപം ഒരു വ്യക്തിയെ സർക്കാർ സേന കസ്റ്റഡിയിലെടുക്കാൻ ശ്രമിച്ചപ്പോൾ അസദ് അനുകൂലികൾ തിരിച്ച് ആക്രമിച്ചതാണ് ഏറ്റുമുട്ടലുകൾ ആരംഭിക്കാൻ കാരണമായത്.

അക്രമങ്ങളിൽ 140ൽ പരം സാധാരണക്കാർ കൊല്ലപ്പെട്ടതായി റിപ്പോർട്ടുണ്ട്. ഇതിൽ 50 സർക്കാർ സൈനികരും 45 അസദ് അനുകൂല പോരാളികളും ഉൾപ്പെടുന്നു. ബനിയാസ് പട്ടണത്തിൽ മാത്രം 60 പേരെ വധിച്ചതായി നിരീക്ഷണ കേന്ദ്രങ്ങൾ റിപ്പോർട്ട് ചെയ്യുന്നു.

സിറിയൻ സർക്കാർ മരണസംഖ്യ ഔദ്യോ​ഗികമായി വ്യക്തമാക്കിയിട്ടില്ല. നിലവിലെ ആക്രമണങ്ങൾ മുൻ സർക്കാരുമായി ബന്ധമുള്ള സായുധ ഗ്രൂപ്പുകൾക്ക് കീഴടങ്ങേണ്ടതിന്റെ ആവശ്യകതയെ ശക്തിപ്പെടുത്തുന്നുവെന്ന് ഇടക്കാല പ്രസിഡന്റ് അഹമ്മദ് അൽ ഷറ പറഞ്ഞു. അക്രമങ്ങൾ വർദ്ധിക്കുന്നതോടെ, സിറിയയുടെ തീരദേശ പ്രദേശങ്ങളിൽ കൂടുതൽ സൈനികരെ നിയോഗിക്കുകയും നിരോധനങ്ങൾ കടുപ്പിക്കുകയും ചെയ്തിട്ടുണ്ട്. സിറിയയിൽ തുടരുന്ന സംഘർഷങ്ങൾ ഐക്യം പുനഃസ്ഥാപിക്കാനുള്ള നടപടികൾക്ക് വിരുദ്ധമാണെന്ന് തുർക്കി അറിയിച്ചു.