ദുബൈ: 2025 ഐസിസി ചാംപ്യൻസ്‌ ട്രോഫിയിൽ ന്യൂസിലാന്റിനെ നാല് വിക്കറ്റുകൾക്ക് പരാജയപ്പെടുത്തി ഇന്ത്യ മൂന്നാം  ചാംപ്യൻസ്‌ ട്രോഫി സ്വന്തമാക്കിയിരിക്കുകയാണ്. മത്സരത്തിൽ ആദ്യം ബാറ്റ് ചെയ്ത കിവീസ് ഏഴ് വിക്കറ്റ് നഷ്ടത്തിൽ 251 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ഇന്ത്യ ആറ് വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. ഇന്ത്യയുടെ കിരീടനേട്ടത്തിലും തന്നെ സങ്കടപ്പെടുത്തുന്ന കാര്യമെന്താണെന്ന് പറയുകയാണ് ഇന്ത്യൻ സൂപ്പർതാരം വിരാട് കോഹ്‌ലി. ന്യൂസിലാൻഡ് താരം കെയ്ൻ വില്യംസണിന്റെ കാര്യത്തിൽ തനിക്ക് സങ്കടമുണ്ടെന്നാണ് കോഹ്‌ലി പറഞ്ഞത്. 

'എന്റെ സുഹൃത്ത് കെയ്ൻ വില്യംസണിനെ ഫൈനലിൽ തോറ്റ ടീമിൽ കാണുമ്പോൾ എനിക്ക് വളരെയധികം സങ്കടമുണ്ട്. എന്നാൽ അദ്ദേഹം വിജയിച്ച ടീമിൽ ഉണ്ടായിരുന്ന സമയങ്ങളിൽ ഞാൻ രണ്ട് തവണ തോറ്റ ടീമിൽ ഉണ്ടായിരുന്നു. അതുകൊണ്ട് ഞങ്ങൾക്കിടയിൽ സ്നേഹം മാത്രമാണുള്ളത്,' വിരാട് കോഹ്‌ലി ഹോസ്റ്റ് ബ്രോഡ്‌കാസ്റ്ററിലൂടെ പറഞ്ഞു. 

2019 ഐസിസി ഏകദിന ലോകകപ്പ് സെമി ഫൈനലിൽ ഇന്ത്യയെ പരാജയപ്പെടുത്തിയാണ് ന്യൂസിലാൻഡ് ഫൈനലിലേക്ക് മുന്നേറിയത്. എന്നാൽ ഫൈനലിൽ ഇംഗ്ലണ്ടിനെതിരെ കിവീസിന് കിരീടം നഷ്ടമാവുകയായിരുന്നു. 2021 വേൾഡ് ടെസ്റ്റ് ചാമ്പ്യൻഷിപ്പിൽ ഇന്ത്യയെ പരാജയപ്പെടുത്തി കിരീടം നേടാനും കിവീസിന് സാധിച്ചിരുന്നു. 

ടൂർണമെന്റിൽ ഒരു മത്സരം പോലും പരാജയപ്പെടാതെയാണ് ഇന്ത്യ ചാമ്പ്യൻമാരായത്. ഗ്രൂപ്പ് ഘട്ടത്തിൽ ബംഗ്ലാദേശ്, പാകിസ്താൻ, ന്യൂസിലാൻഡ് എന്ന ടീമുകളെ പരാജയപ്പെടുത്തി ചാമ്പ്യന്മാർ ആയിട്ടായിരുന്നു ഇന്ത്യ സെമിയിലേക്ക് മുന്നേറിയത്. സെമിയിൽ ഓസ്ട്രേലിയയെയും കീഴടക്കിയാണ് ഇന്ത്യ ഫൈനലിലേക്ക് മുന്നേറിയിരുന്നത്. എന്നാൽ ന്യൂസിലാൻഡ് രണ്ട് തവണയാണ് ടൂർണമെന്റിൽ പരാജയപ്പെട്ടത്. രണ്ട് മത്സരത്തിലും ഇന്ത്യയോടാണ് കിവീസ് തോൽവി ഏറ്റുവാങ്ങിയത്. 

അതേസമയം മത്സരത്തിൽ ഇന്ത്യക്കായി അർദ്ധ സെഞ്ച്വറി നേടി ക്യാപ്റ്റൻ രോഹിത് ശർമ തകർപ്പൻ പ്രകടനമാണ് നടത്തിയത്. ഏഴ് ഫോറുകളും മൂന്ന് സിക്സുകളും അടക്കം 83 പന്തിൽ 76 റൺസായിരുന്നു രോഹിത് നേടിയത്. ശ്രേയസ് അയ്യർ 62 പന്തിൽ 48 റൺസും കെഎൽ രാഹുൽ 33 പന്തിൽ പുറത്താവാതെ 34 റൺസും നേടി 50 പന്തിൽ 31 റൺസ് നേടി ശുഭ്മൻ ഗില്ലും ഇന്ത്യയുടെ വിജയത്തിൽ നിർണായകമായി.