മലപ്പുറം: കഞ്ചാവ് ലഹരിയിൽ വെട്ടുകത്തിയുമായി 15 കാരന്റെ ഭീഷണി. സംഭവം ചേകന്നൂർ അങ്ങാടിയിലാണ് ഉണ്ടായത്. ഹാർഡ്‍വേർ ഷോപ്പിൽ നിന്ന് വെട്ടുകത്തി എടുത്ത് ഭീഷണിപ്പെടുത്തിയ പതിനഞ്ചുകാരനെ നാട്ടുകാർ പിടികൂടി പൊന്നാനി പൊലീസിന് കൈമാറി.

കഴിഞ്ഞ ദിവസം വൈകിട്ട് 5.30 ഓടെയാണ് സംഭവം. ആനക്കര സ്കൂളിന് സമീപം നടന്ന പൂരം കാണാനെത്തിയ യുവാക്കൾ തമ്മിൽ വാക്കുതർക്കവും കയ്യാങ്കളിയും ഉണ്ടായതോടെ അന്തരീക്ഷം സംഘർഷഭരിതമായി. ഇതിന് പിന്നാലെയാണ് 15 കാരൻ്റെ വെട്ടുകത്തിയുമായി 15 കാരന്റെ ഭീഷണി ഉണ്ടായത്.

 4 കിലോ കഞ്ചാവുമായി യുവാവ് പിടിയിൽ

കാഞ്ഞങ്ങാട്: കാസർഗോഡ് കോയിപ്പാടിയിൽ കഞ്ചാവുമായി യാത്ര ചെയ്ത യുവാവ് എക്സൈസിന്റെ പിടിയിലായി. ബംബ്രാണ സ്വദേശി സുനിൽകുമാർ എം (35) ആണ് 4 കിലോഗ്രാമിലധികം കഞ്ചാവുമായി അറസ്റ്റിലായത്. കാസർഗോഡ് എക്സൈസ് സ്പെഷ്യൽ സ്ക്വാഡിന്റെ നേതൃത്വത്തിൽ നടത്തിയ പരിശോധനയിലാണ് ഇയാൾ പിടിയിലായത്.

വാഹനപരിശോധനയ്ക്കിടെ ബ്ലാക്ക് ആക്ടീവ സ്കൂട്ടറിൽ എത്തിയ സുനിൽകുമാർ എക്സൈസ് സംഘത്തെ കണ്ട് രക്ഷപ്പെടാൻ ശ്രമിച്ചു. സംശയം തോന്നിയ സംഘം വാഹന പരിശോധന നടത്തുകയും സീറ്റിനടിയിൽ ഒളിപ്പിച്ച കഞ്ചാവ് കണ്ടെത്തുകയും ചെയ്തു. എക്സൈസ് ഇൻസ്പെക്ടർ ജോസഫ് ജെ.യുടെ നേതൃത്വത്തിലുള്ള സംഘം പ്രതിയെ അറസ്റ്റ് ചെയ്തു.

സംഘത്തിലുണ്ടായിരുന്ന അസിസ്റ്റൻറ് എക്സൈസ് ഇൻസ്പെക്ടർ (ഗ്രേഡ്) സി.കെ.വി. സുരേഷ്, പ്രിവന്റീവ് ഓഫീസർമാരായ പ്രശാന്ത് കുമാർ, അജീഷ് സി., സിവിൽ എക്സൈസ് ഓഫീസർമാരായ അതുൽ ടി.വി., സതീശൻ കെ., വനിത സിവിൽ എക്സൈസ് ഓഫീസർ സജ്‌ന, ഡ്രൈവർ സജീഷ് എന്നിവരാണ് പ്രതിയെ പിടികൂടിയത്.

തൃശൂർ റെയിൽവേ സ്റ്റേഷനിൽ 13.2 കിലോ കഞ്ചാവ് കണ്ടെത്തി

ഇതിനിടെ, തൃശൂർ റെയിൽവേ സ്റ്റേഷനിൽ എക്സൈസും റെയിൽവേ പൊലീസും സംയുക്തമായി നടത്തിയ പരിശോധനയിൽ 13.2 കിലോഗ്രാം കഞ്ചാവ് കണ്ടെത്തി. പ്ലാറ്റ്‌ഫോമിൽ ഉപേക്ഷിച്ച നിലയിൽ കഞ്ചാവ് കണ്ടെത്തിയതായി അധികൃതർ വ്യക്തമാക്കി.

പ്രതിക്കായുള്ള അന്വേഷണം ആരംഭിച്ചിട്ടുണ്ടെന്ന് തൃശൂർ എക്സൈസ് സ്പെഷ്യൽ സ്ക്വാഡിന്റെ ഇൻസ്‌പെക്ടർ എൻ. സുദർശനകുമാർ അറിയിച്ചു. പരിശോധനയിൽ പ്രിവന്റീവ് ഓഫീസർ (ഗ്രേഡ്) ബാബു, സിവിൽ എക്സൈസ് ഓഫീസർമാരായ റിജോ, കണ്ണൻ, ഡ്രൈവർ സംഗീത് എന്നിവരും പങ്കെടുത്തു.