കൊച്ചി: ഉപഭോക്താക്കളെ ഞെട്ടിച്ച് കേരളത്തില്‍ സ്വര്‍ണവിലയില്‍ ഇന്നും വന്‍കുതിപ്പ്. ആഗോള വിപണിയില്‍ വില കൂടുന്നതിന് അനുപാതമായാണ് കേരളത്തിലും വര്‍ധനയെന്നാണ് നിരീക്ഷകര്‍ പറയുന്നത്. വരും ദിവസങ്ങളിലും വില കൂടുമെന്ന് തന്നെയാണ് സൂചന. കഴിഞ്ഞാഴ്ച താരതമ്യേന വിലയില്‍ കുറവാണ് രേഖപ്പെടുത്തിയിരുന്നത്. എന്നാല്‍ അതിന് പകരം ഈ ആഴ്ച വിലയില്‍ വര്‍ധനയോട് വര്‍ധനയാണ്. 

അതുകൊണ്ട് തന്നെ കഴിഞ്ഞയാഴ്ച അഡ്വാന്‍സ് ബുക്കിങ് നടത്തിയവര്‍ക്ക് ആശ്വസിക്കാം. ഇന്നത്തെ വില വര്‍ധന അവരെ ഒരു നിലക്കും ബാധിക്കില്ല എന്നു തന്നെ പറയാം. കേരളത്തില്‍ ഇതുവരെ രേഖപ്പെടുത്തിയതില്‍ ഏറ്റവും ഉയര്‍ന്ന വിലയാണ് ഇന്ന്.

ഇന്ത്യയില്‍ ചില്ലറ മേഖലയിലെ പണപ്പെരുപ്പം കുറഞ്ഞു എന്ന റിപ്പോര്‍ട്ട് കഴിഞ്ഞ ദിവസം പുറത്തു വന്നിരുന്നു. അമേരിക്കയിലും ഇതേ സ്ഥിതിയാണെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. അതുകൊണ്ടുതന്നെ അടുത്ത മാസം അമേരിക്കന്‍ കേന്ദ്ര ബാങ്ക് പലിശ നിരക്ക് കുറച്ചേക്കുമെന്ന് സൂചനകളുണ്ടായിരുന്നു.  ഇന്ത്യയുടെ ആര്‍.ബി.ഐയും ഇതേ നിലപാട് സ്വീകരിക്കുമെന്നും റിപ്പോര്‍ട്ടുകളുണ്ടായിരുന്നു. ഇത് വന്‍തോതില്‍ സ്വര്‍ണത്തിലേക്ക് നിക്ഷേപകരെ ആകര്‍ഷിച്ചു. വിലക്കൂടുതലിന് ഒരു കാരണം ഇതാണ് വിദഗ്ധര്‍ ചൂണ്ടിക്കാട്ടുന്നത്. 

കേരളത്തില്‍ ഇന്നലെ 22 കാരറ്റ് ഒരു പവന്‍ സ്വര്‍ണത്തിന് 64960 രൂപയായിരുന്നു വില. പവന് 440 രൂപയാണ് വര്‍ധിച്ചത്. ഗ്രാമിന് 55 രൂപ വര്‍ധിച്ച് 8120 രൂപയായി. അതേസമയം, 18 കാരറ്റ് സ്വര്‍ണം ഗ്രാമിന് 45 രൂപ വര്‍ധിച്ച് 6680 രൂപയായി. കേരളത്തില്‍ വെള്ളിയുടെ വിലയില്‍ ഇന്നലെ മാറ്റമൊന്നും രേഖപ്പെടുത്തിയിരുന്നില്ല.  ഗ്രാമിന് 108 രൂപ എന്ന നിരക്കില്‍ തുടരുകയാണ്.

ഇന്ന് 22 കാരറ്റ് സ്വര്‍ണത്തിന് 880 രൂപയാണ് പവന് വര്‍ധിച്ചിരിക്കുന്നത്. 65,840 ആണ് ഇന്ന് ഒരു പവന്‍ സ്വര്‍ണത്തിന്റെ വില. 

63520 രൂപയായിരുന്നു കേരളത്തില്‍ ഈ മാസം രേഖപ്പെടുത്തിയ ഏറ്റവും കുറഞ്ഞ പവന്‍ നിരക്ക് . ഇന്നലെയാണ് ഇതിന് മുമ്പ് സര്‍വകാല റെക്കോര്‍ഡ് വില രേഖപ്പെടുത്തിയത്. ഒരു പവന് 64,960രൂപയായിരുന്നു അന്ന് ഈടാക്കിയത്. ആ റെക്കോര്‍ഡ് മറികടന്നിരിക്കുകയാണ് ഇന്ന്.