ദുബൈ: മയക്കുമരുന്ന് കൈവശം വച്ചതിനും ഉപയോഗിച്ചതിനും 35 വയസ്സുകാരിയായ അറബ് സ്ത്രീക്ക് ദുബൈ കോടതി 10 വര്‍ഷം തടവും 100,000 ദിര്‍ഹം പിഴശിക്ഷയും വിധിച്ചു. ശിക്ഷ പൂര്‍ത്തിയാക്കിയ ശേഷം ഇവരെ നാടുകടത്താനും ദുബൈ ക്രിമിനല്‍ കോടതി ഉത്തരവിട്ടു.

യുഎഇ സെന്‍ട്രല്‍ ബാങ്കിന്റെ മുന്‍കൂര്‍ അനുമതിയില്ലാതെ ആഭ്യന്തര മന്ത്രാലയവുമായി ഏകോപിപ്പിച്ച് പണം കൈമാറ്റം ചെയ്യുന്നതിനോ നിക്ഷേപിക്കുന്നതിനോ യുവതിക്ക് വിലക്കേര്‍പ്പെടുത്തുകയും ചെയ്തു. കൂടാതെ സ്ത്രീയുടെ സാമ്പത്തിക ഇടപാടുകള്‍ക്ക് കോടതി രണ്ട് വര്‍ഷത്തെ വിലക്ക് ഏര്‍പ്പെടുത്തി. 

കോടതി രേഖകള്‍ പ്രകാരം, കഴിഞ്ഞ വര്‍ഷം ഏപ്രിലില്‍ അല്‍ ഖിയാദ മെട്രോ സ്റ്റേഷന് സമീപമുള്ള അല്‍ ത്വാറിന് സമീപം സ്ത്രീയുടെ മയക്കുമരുന്ന് പ്രവര്‍ത്തനങ്ങളെക്കുറിച്ച് ദുബൈ പോലീസിന്റെ മയക്കുമരുന്ന് വിരുദ്ധ വിഭാഗത്തിന് സൂചന ലഭിച്ചു. 

അന്വേഷണത്തില്‍ സ്ത്രീ സോഷ്യല്‍ മീഡിയ പ്ലാറ്റ്‌ഫോമുകള്‍ വഴി മയക്കുമരുന്ന് വാങ്ങിയിരുന്നതായും മയക്കുമരുന്ന് എവിടെ നിന്ന് ശേഖരിക്കണമെന്ന് നിര്‍ദ്ദേശങ്ങള്‍ ലഭിക്കുന്നതിന് മുമ്പ് മയക്കുമരുന്ന് വാങ്ങിയ വ്യക്തിയുടെ പ്രാദേശിക ബാങ്ക് അക്കൗണ്ടുകളിലേക്ക് പണമടച്ചിരുന്നതായും കണ്ടെത്തി.

കേസ് അന്വേഷിച്ച പൊലിസ് ഉദ്യോഗസ്ഥന്‍ പറയുന്നതനുസരിച്ച് സ്ത്രീ അടുത്തിടെ 500 ദിര്‍ഹത്തിന്റെ മയക്കുമരുന്ന് വാങ്ങിയിരുന്നു. മയക്കുമരുന്ന വാങ്ങേണ്ട ലൊക്കേഷന്‍ അടങ്ങിയ വാട്ട്‌സ്ആപ്പ് സന്ദേശം ലഭിക്കുന്നതിന് മുമ്പ് തുക ബാങ്ക് അക്കൗണ്ടിലേക്ക് ട്രാന്‍സ്ഫര്‍ ചെയ്തു.

യുവതി വാഹനമോടിക്കവേ, ഇവരുടെ വീടിനടുത്ത് നിന്ന് പൊലിസ് ഇവരെ അറസ്റ്റ് ചെയ്യുകയായിരുന്നു. യുവതിയുടെ വാഹനം പരിശോധിച്ച പൊലിസ് ധാരാളം നിരോധിത വസ്തുക്കള്‍ കണ്ടെത്തി. ഫോറന്‍സിക് പരിശോധനകളില്‍ യുവതിയുടെ മയക്കുമരുന്ന് ഉപയോഗം സ്ഥിരീകരിച്ചു. ചോദ്യം ചെയ്യലില്‍, രാജ്യത്തിന് പുറത്തുള്ള ഒരു വ്യക്തിയില്‍ നിന്നാണ് മയക്കുമരുന്ന് വാങ്ങിയതെന്ന് യുവതി സമ്മതിച്ചിട്ടുണ്ട്. 

തുടര്‍ന്ന് തെളിവുകളുടെ അടിസ്ഥാനത്തില്‍ കോടതി യുവതിയെ കുറ്റക്കാരിയാണെന്ന് കണ്ടെത്തി ശിക്ഷ വിധിക്കുകയായിരുന്നു.

Woman sentenced to 10 years in prison, Dh100,000 fine for drug possession and use in Dubai