സ്‌പെയ്ൻ: സ്പാനിഷ് വമ്പന്മാരായ റയൽ മാഡ്രിഡിനായി ഫ്രഞ്ച് സൂപ്പർതാരം കിലിയൻ എംബാപ്പെ നിലവിൽ മിന്നും ഫോമിലാണ് കളിക്കുന്നത്. കഴിഞ്ഞ ദിവസം സ്പാനിഷ് ലീഗിൽ വിയ്യാറയലിനെതിരെയുള്ള മത്സരത്തിൽ ഇരട്ട ഗോൾ നേടിയാണ് എംബാപ്പെ തിളങ്ങിയത്. റയലിനായി തന്റെ അരങ്ങേറ്റ സീസണിൽ തന്നെ 32 ഗോളുകളാണ് താരം ഇതിനോടകം തന്നെ നേടിയിട്ടുള്ളത്. ഇതിഹാസ താരം ക്രിസ്റ്റ്യാനോ റൊണാൾഡോ റയലിനായി അരങ്ങേറ്റ സീസണിൽ 35 മത്സരങ്ങളിൽ നിന്ന് 33 ഗോളുകളും 10 അസിസ്റ്റുകളും ആണ് നേടിയിട്ടുള്ളത്. വരാനിരിക്കുന്ന മത്സരങ്ങളിൽ രണ്ട് ഗോളുകൾ കൂടി നേടിയാൽ റൊണാൾഡോയുടെ റെക്കോർഡും ഫ്രഞ്ച് താരത്തിന് തകർക്കാൻ സാധിക്കും. ഇപ്പോഴിതാ റൊണാൾഡോയുടെ ഈ റെക്കോർഡ് മറികടക്കുന്നതിനെക്കുറിച്ച് സംസാരിക്കുകയാണ് എംബാപ്പെ. 

 ക്രിസ്റ്റ്യാനോ റൊണാൾഡോയേക്കാൾ കൂടുതൽ ഗോളുകൾ നേടിയാൽ അതിന്റെ അർത്ഥം ഞാൻ അദ്ദേഹത്തേക്കാൾ വലുതാണെന്നല്ല. ഇത് വെറും നമ്പറുകൾ മാത്രമാണ്. കിരീടങ്ങൾ നേടുക എന്നതാണ് എന്റെ മുന്നിലുള്ള പ്രധാന കാര്യം,' എംബാപ്പെ മാഡ്രിഡ് എക്സ്ട്രായിലൂടെ പറഞ്ഞു. 

റയൽ മാഡ്രിഡിനായി അരങ്ങേറ്റ സീസണിൽ തന്നെ ഏറ്റവും കൂടുതൽ ഗോളുകൾ നേടിയ താരമെന്ന റെക്കോർഡ് ഇവാൻ സമോറാനോയുടെ പേരിലാണുള്ളത്. റയലിനായി അരങ്ങേറ്റ സീസണിൽ 39 ഗോളുകളാണ് താരം നേടിയത്. ഇതിനോടകം തന്നെ 32 ഗോളുകൾ സ്വന്തമാക്കിയ എംബാപ്പെക്ക് ഈ റെക്കോർഡ് തകർക്കാനുള്ള അവസരവും മുന്നിലുണ്ട്. 

നിലവിൽ സ്പാനിഷ് ലീഗിൽ ഒന്നാം സ്ഥാനത്താണ് റയൽ മാഡ്രിഡ്. 28 മത്സരങ്ങളിൽ നിന്നും 18 വിജയവും ആറ് സമനിലയും നാല് തോൽവിയും അടക്കം 60 പോയിൻ്റാണ് റയലിൻ്റെ കൈവശമുള്ളത്. 57 പോയിൻ്റുമായി ബാഴ്സലോണയാണ് രണ്ടാം സ്ഥാനത്തുള്ളത്. ചാമ്പ്യൻസ് ലീഗിലും റയൽ മികച്ച മുന്നേറ്റമാണ് നടത്തുന്നത്. പ്രീ ക്വാർട്ടറിൽ അറ്റ്ലറ്റികോ മാഡ്രിഡിനെ പരാജയപ്പെടുത്തിയാണ് കാർലോ ആൻസലോട്ടിയും സംഘവും അടുത്ത റൗണ്ടിലേക്ക് മുന്നേറിയത്.  രണ്ട് പാദങ്ങളിലുമായി ഇരു ടീമുകളും 2-2 എന്ന അഗ്രിഗേറ്റ് സ്കോർ നേടിയപ്പോൾ മത്സരം പെനാൽറ്റി വിധിയെഴുതുകയായിരുന്നു. പെനാൽറ്റിയിൽ അത്ലെറ്റികോ മാഡ്രിഡിനെ 4-2നാണ് റയൽ പരാജയപ്പെടുത്തിയത്.