കൊല്ലം: ഇരവിപുരം പള്ളിക്കു മുന്നിലെ റോഡില്‍ പേപ്പറില്‍ പൊതിഞ്ഞ നിലയില്‍ കാണപ്പെട്ട ബാഗേജ് പരിഭ്രാന്തിക്കിടയാക്കി. വെള്ളിയാഴ്ച രാത്രി 9.30 ഓടെയാണ് അയത്തില്‍ മുഹിയിദ്ദീന്‍ പള്ളിക്കു മുന്നില്‍ പേപ്പറില്‍ പൊതിഞ്ഞ നിലയില്‍ ബാഗേജ് കാണപ്പെട്ടത്.
ആളിലാത്ത നിലയില്‍ ഇതു കണ്ടതോടെ പരിഭ്രാന്തരായ നാട്ടുകാര്‍ ബോംബാകാമെന്ന സംശയത്തില്‍ പൊലിസിനെ വിവരം അറിയിക്കുകയായിരുന്നു. കൈപ്പിടിയുള്ള ഒരു കവറിനു ചുറ്റും പേപ്പര്‍ വച്ച് പൊതിഞ്ഞ ശേഷം അതിനു മുകളില്‍ ടേപ്പ് ഒട്ടിച്ച ശേഷം രണ്ടു മൊബൈല്‍ഫോണ്‍ നമ്പരുകളും എഴുതിയിരുന്നു. സംഭവമറിഞ്ഞ് സ്ഥലത്തെത്തിയ ഇരവിപുരം സി.ഐ പങ്കജാക്ഷന്റെ നേതൃത്വത്തിലുള്ള പൊലിസ് സംഘം വിവരം അറിയിച്ചതനുസരിച്ച് സ്ഥലത്തെത്തിയ ബോംബ് സ്‌ക്വാഡ് ബാഗേജ് എടുത്തു പരിശോധന നടത്തി.
ഇതിനുള്ളില്‍ മൊബൈല്‍ ഫോണിന്റെ കവറുകളും മറ്റുമാണ് ഉണ്ടായിരുന്നത്. ഇത് ഇരവിപുരം എസ്.ഐ മുഹമ്മദ് ഷാഫിയുടെ നേതൃത്വത്തില്‍ ബോംബ് സ്‌ക്വാഡില്‍ നിന്നും ഏറ്റുവാങ്ങി സ്റ്റേഷനിലേക്ക് കൊണ്ടുപോയി.
ബാഗേജിനു മുകളിലുണ്ടായിരുന്ന മൊബൈല്‍ നമ്പറില്‍ പൊലിസ് ബന്ധപ്പെടാന്‍ ശ്രമിച്ചെങ്കിലും ഫോണ്‍ സ്വിച്ച് ഓഫ് ചെയ്ത നിലയിലായിരുന്നു.
സൈബര്‍ സെല്ലിന്റെ സഹായത്തോടെ ഇവരെ കണ്ടെത്താന്‍ പൊലിസ് ശ്രമം ആരംഭിച്ചിട്ടുണ്ട്. ഉപേക്ഷിക്കപ്പെട്ട നിലയില്‍ ബോംബ് കണ്ടെത്തിയെന്ന വാര്‍ത്ത പരന്നതോടെ രാത്രിയില്‍ നിരവധി പേരാണ് ഇവിടെ തടിച്ചുകൂടിയത്. രാത്രി 12 ഓടെ ബാഗേജില്‍ ബോംബല്ലെന്ന് അറിഞ്ഞതോടെയാണ് പരിഭ്രാന്തിക്ക് വിരാമമായത്.