തിരുവനന്തപുരം: വയനാട് ജില്ലയിലെ മുണ്ടക്കൈ, ചൂരല്‍മല  ഉരുള്‍പൊട്ടലില്‍ മാതാപിതാക്കള്‍ നഷ്ടപ്പെട്ട 7 കുട്ടികള്‍ക്കും മാതാപിതാക്കളില്‍ ഒരാള്‍ മാത്രം നഷ്ടപ്പെട്ട 14 കുട്ടികള്‍ക്കും പഠനാവശ്യത്തിനുമാത്രം 10 ലക്ഷം രൂപ വീതം അധിക സഹായം അനുവദിക്കാന്‍ മന്ത്രിസഭാ യോഗ തീരുമാനം. വനിതശിശു വികസന വകുപ്പ് അനുവദിച്ച ധനസഹായത്തിന് പുറമെയാണിത്. തുക കലക്ടറുടെ അക്കൗണ്ടില്‍ നിക്ഷേപിച്ച് പ്രതിമാസ പലിശ കുട്ടിയുടെ രക്ഷകര്‍ത്താവിന് ഓരോ മാസവും നല്‍കും.

ടൗണ്‍ഷിപ്പിനായി ഏറ്റെടുക്കുന്ന എല്‍സ്റ്റോണ്‍ എസ്റ്റേറ്റിലെ 64.4075 ഹെക്ടര്‍ ഭൂമിക്ക് നഷ്ടപരിഹാരമായി 26,56,10,769 രൂപ മുഖ്യമന്ത്രിയുടെ ദുരിതാശ്വാസ നിധിയില്‍നിന്ന് അനുവദിക്കും. ഹൈക്കോടതിയില്‍ നല്‍കിയ അപ്പീലുകള്‍ ഉടന്‍ പിന്‍വലിക്കാന്‍ എസ്റ്റേറ്റ് ഉടമകളോട് സര്‍ക്കാര്‍ ആവശ്യപ്പെട്ടിട്ടുണ്ട്. അപ്പീല്‍ ഉടമകള്‍ പിന്‍വലിച്ചില്ലെങ്കില്‍ കോടതിയില്‍ സര്‍ക്കാര്‍ വില നിശ്ചയിച്ച വിവരം അറിയിക്കും. തുടര്‍നടപടികള്‍ കോടതി നിര്‍ദേശ പ്രകാരം നടത്തും. പദ്ധതി നിര്‍വഹണ യൂനിറ്റില്‍ അക്കൗണ്ട്‌സ് ഓഫിസര്‍, സിവില്‍ എന്‍ജിനീയര്‍ തസ്തികകള്‍ സൃഷ്ടിക്കും. പ്രോജക്ട് ഇംപ്ലിമെന്റേഷന്‍ യൂനിറ്റിന്റെ തലവനായി വയനാട് ടൗണ്‍ഷിപ്പ് പ്രോജക്ട് സ്‌പെഷല്‍ ഓഫിസറെ ചുമതലപ്പെടുത്തും. 

Mundakkai Chooralmala Rehabilitation Permission Granted for Special Study allowance of ten Lakhs