ഗസ്സ സിറ്റി:  ഗസ്സയിലെ സ്ഥിതി അതീവ ഗുരുതരവും ആശങ്കാജനകവുമാണെന്ന് യുഎൻആർഡബ്ല്യുഎ ( United Nations Relief and Works Agency for Palestine) മേധാവി ഫിലിപ്പ് ലാസറിനി മുന്നറിയിപ്പ് നൽകി. 2023 ഒക്ടോബറിൽ സംഘർഷം ആരംഭിച്ചതിനുശേഷം ഗസ്സയിലേക്ക് ഒരു സാധനവും പ്രവേശിക്കാത്ത ഏറ്റവും ദൈർഘ്യമേറിയ കാലഘട്ടമാണ് ഇപ്പോൾ അനുഭവപ്പെടുന്നത്. "ഇസ്റാഈൽ സേനയുടെ വ്യോമ, കടൽ, കര ആക്രമണങ്ങൾ തുടർച്ചയായി മൂന്നാം ദിവസവും ശക്തമായി നടക്കുന്നു. വടക്കും തെക്കും വേർതിരിക്കുന്ന തുടർച്ചയായ ആക്രമണങ്ങൾ കണക്കിലെടുക്കുമ്പോൾ, ഇതിനേക്കാൾ ഭീകരമായ അവസ്ഥ ഇനിയും വരാനിരിക്കുന്നതിൽ ഞങ്ങൾ ആശങ്കാകുലരാണ്." ലാസറിനി എക്സിൽ രേഖപ്പെടുത്തി.

ബുധനാഴ്ച ഇസ്റാഈൽ ഗസ്സയിൽ പുതിയ കര ആക്രമണങ്ങൾ പ്രഖ്യാപിക്കുകയും, ബന്ദികളെ മോചിപ്പിക്കാനും ഹമാസിനെ അധികാരത്തിൽ നിന്ന് പുറന്തള്ളാനും പ്രദേശവാസികൾക്ക് അവസാന മുന്നറിയിപ്പ് നൽകുകയും ചെയ്തു. ചൊവ്വാഴ്ച പുലർച്ചെ ആരംഭിച്ച കനത്ത വ്യോമാക്രമണങ്ങളിൽ, 190-ലധികം കുട്ടികൾ ഉൾപ്പെടെ കുറഞ്ഞത് 590-ലേറെ പേർ കൊല്ലപ്പെട്ടതായി ഹമാസിന്റെ നിയന്ത്രണത്തിലുള്ള ഗസ്സയിലെ സിവിൽ ഡിഫൻസ് ഏജൻസി റിപ്പോർട്ട് ചെയ്തു. വ്യാഴാഴ്ച പുലർച്ചെ ഖാൻ യൂനിസിന് സമീപമുണ്ടായ ബോംബാക്രമണത്തിൽ കുറഞ്ഞത് 10 പേർ കൂടി മരിച്ചതായി രക്ഷാപ്രവർത്തകർ സ്ഥിരീകരിച്ചു.

പലസ്തീൻ പ്രദേശത്തിന്റെ പ്രധാന വടക്ക്-തെക്ക് ഗതാഗത പാതയിൽ ഇസ്റാഈൽ സൈന്യം വ്യാഴാഴ്ച ഗതാഗതം പൂർണമായി നിരോധിച്ചു. പതിനായിരക്കണക്കിന് ആളുകളെ ബാധിക്കുന്ന ഒഴിപ്പിക്കൽ ഉത്തരവുകൾ പുറപ്പെടുവിച്ചിരിക്കുന്നു ലാസറിനി വ്യക്തമാക്കി. "യുദ്ധം തുടങ്ങി ഒന്നര വർഷത്തിനുശേഷം, ബഹുഭൂരിപക്ഷം ജനങ്ങളും ഇതിനകം കുടിയിറക്കപ്പെട്ടവരാണ്.

ജനുവരി മധ്യത്തിൽ ദുർബലമായ ഒരു വെടിനിർത്തൽ നിലവിൽ വന്നതിനുശേഷം ​ഗസ്സയിൽ ഉണ്ടായിരുന്ന ആപേക്ഷിക ശാന്തത  ഇസ്റാഈലിന്റെ പുതിയ ആക്രമണങ്ങൾ തകർത്തു. മാർച്ച് മുതൽ ​ഗസ്സയിലേക്കുള്ള മാനുഷിക സഹായം ഇസ്റാഈൽ  ഉപരോധിച്ചതിനെ UNRWA മേധാവി ശക്തമായി വിമർശിച്ചു. "ഇനി സമയമില്ല. നമുക്ക് അടിയന്തിരമായി വേണ്ടത് വെടിനിർത്തലിന്റെ പുനരാരംഭം, ​ഗസ്സയിലെ എല്ലാ ബന്ദികളുടെയും മാന്യമായ മോചനം, മാനുഷിക സഹായങ്ങളുടെയും വാണിജ്യ സാധനങ്ങളുടെയും തടസ്സമില്ലാത്ത ഒഴുക്ക് എന്നിവയാണ്," അദ്ദേഹം ആവശ്യപ്പെട്ടു.

15 മാസത്തിലേറെ നീണ്ട സംഘർഷത്തിന് ശമനം വരുത്തിയ ​ഗസ്സ വെടിനിർത്തലിന്റെ ആദ്യ ഘട്ടം ഈ മാസം ആദ്യം സ്തംഭനാവസ്ഥയിൽ അവസാനിച്ചു. രണ്ടാം ഘട്ട ചർച്ചകൾ ഇസ്റാഈൽ നിരസിച്ചു, പകരം ആദ്യ ഘട്ടത്തിൽ ശേഷിക്കുന്ന എല്ലാ ബന്ദികളെയും തിരികെ കൊണ്ടുവരണമെന്ന് ആവശ്യപ്പെട്ടു. ഇത് ശാശ്വത വെടിനിർത്തലിനെക്കുറിച്ചുള്ള ചർച്ചകൾ വൈകിപ്പിക്കുമെന്ന് ഹമാസ് വിലയിരുത്തി, യഥാർത്ഥ കരാർ വീണ്ടും ചർച്ച ചെയ്യാനുള്ള ശ്രമമായി ഇതിനെ നിരസിച്ചു.

ഹമാസ് ബന്ദികളെ മോചിപ്പിക്കാത്ത പക്ഷം ​ഗസ്സ മുനമ്പിന്റെ ചില ഭാഗങ്ങൾ ഇസ്റാഈൽ സ്ഥിരമായി പിടിച്ചെടുക്കുമെന്ന് പ്രതിരോധ മന്ത്രി ഇസ്റാഈൽ കാറ്റ്സ് വെള്ളിയാഴ്ച മുന്നറിയിപ്പ് നൽകി. ഗസ്സയിലെ കൂടുതൽ പ്രദേശങ്ങൾ പിടിച്ചെടുക്കാനും, ജനങ്ങളെ ഒഴിപ്പിക്കാനും, ഇസ്റാഈൽ സമൂഹങ്ങളെയും ഐഡിഎഫ് സൈനികരെയും സംരക്ഷിക്കാൻ ​ഗസ്സയ്ക്ക് ചുറ്റുമുള്ള സുരക്ഷാ മേഖലകൾ വിപുലീകരിക്കാനും ഞാൻ ഐഡിഎഫിന് നിർദ്ദേശം നൽകിയിട്ടുണ്ട്. ഹമാസ് ബന്ദികളെ മോചിപ്പിക്കാൻ വിസമ്മതിക്കുന്നതിന്റെ ഓരോ നിമിഷവും അവർക്ക് കൂടുതൽ ഭൂമി നഷ്ടപ്പെടും, അത് ഇസ്റാഈലിന്റെ ഭാഗമാകും" കാറ്റ്സ് ശക്തമായി പ്രഖ്യാപിച്ചു.

ഈ ആഴ്ച ഇസ്റാഈൽ ​ഗസ്സയിൽ വീണ്ടും യുദ്ധം ആരംഭിച്ചതിനുശേഷം കുറഞ്ഞത് 200 കുട്ടികൾ ഉൾപ്പെടെ 590-ലധികം പലസ്തീനികൾ കൊല്ലപ്പെട്ടതായി മെഡിക്കൽ അധികൃതർ സ്ഥിരീകരിച്ചു. "ബന്ദികളെ മോചിപ്പിക്കുന്നതുവരെ ​ഗസ്സയുടെ ഭൂമി ഇസ്റാഈൽ പിടിച്ചെടുക്കും," കാറ്റ്സ് ആവർത്തിച്ചു. "ഹമാസ് എത്രത്തോളം വിസമ്മതിക്കുന്നുവോ, അത്രത്തോളം പ്രദേശങ്ങൾ അവർക്ക് നഷ്ടമാകും, അത് ഇസ്റാഈലിന്റെ ഭാഗമായി മാറും.