തൃശൂര്‍: തൃശ്ശൂര്‍ പെരുമ്പിലാവില്‍ ലഹരി മാഫിയ ഒട്ടേറെ കേസുകളില്‍ പ്രതിയായ യുവാവിനെ വെട്ടിക്കൊന്നു. കൂത്തന്‍ എന്നു വിളിക്കപ്പെടുന്ന അക്ഷയ് ആണ് കൊല്ലപ്പെട്ടത്. ഇന്നു രാത്രി എട്ടരയോടെയാണ് സംഭവം.

അക്ഷയും ഭാര്യയും ഇയാളുടെ സുഹൃത്തായ ലിഷോയുടെ വീട്ടിലെത്തിയപ്പോഴാണ് ആക്രമണം ഉണ്ടായത്. അക്ഷയുടെ സുഹൃത്തുക്കളായ ലിഷോയി, ബാദുഷ എന്നിവരാണ് ആക്രമണം നടത്തിയത് എന്നാണ് ലഭിക്കുന്ന വിവരങ്ങള്‍. യുവാവിനെ ആക്രമിക്കുന്നത് കണ്ട ഭാര്യ തൊട്ടടുത്ത വീട്ടിലേക്ക് ഓടിക്കയറി. കൊല്ലപ്പെട്ട അക്ഷയും ലിഷോയിയും ബാദുഷയും സുഹൃത്തുക്കളും ലഹരി കച്ചവടക്കാരുമായിരുന്നു. ലഹരി കച്ചവടവുമായി ബന്ധപ്പെട്ട തര്‍ക്കമാണ് കൊലപാതകത്തിലേക്ക് നയിച്ചത് എന്നാണ് പൊലിസ് സംശയിക്കുന്നത്.

സംഭവത്തില്‍ പരുക്കേറ്റ ബാദുഷ പെരുമ്പിലാവിലെ സ്വകാര്യ ആശുപത്രിയില്‍ ചികിത്സയിലാണ്. അതേസമയം കൊലപാതക ശേഷം ഒളിവില്‍ പോയ ലിഷോയിക്കായി പൊലിസ് അന്വേഷണം ആരംഭിച്ചിട്ടുണ്ട്. അക്ഷയുടെ മൃതദേഹം കുന്നംകുളത്തെ താലൂക്ക് ആശുപത്രിയിലേക്ക് മാറ്റി.