2022ലെ അർജന്റീനയുടെ ലോകകപ്പ് വിജയത്തിൽ നിർണായകമായ പങ്കു വഹിച്ച താരമാരാണെന്ന് തുറന്നു പറഞ്ഞിരിക്കുകയാണ് മുൻ അർജന്റൈൻ ഗോൾ കീപ്പർ ഹ്യുഗോ ഗാട്ടി. ലയണൽ മെസിക്ക് പകരം ഗോൾകീപ്പർ എമിലിയാനോ മാർട്ടിനസിനസ് കാരണമാണ് അർജന്റീന ലോകകപ്പ് നേടിയതെന്നാണ് ഹ്യുഗോ ഗാട്ടി പറഞ്ഞത്. ബൊളിവിപിന് നൽകിയ അഭിമുഖത്തിലാണ് മുൻ അർജന്റൈൻ താരം ഇക്കാര്യം പറഞ്ഞത്. 

''ലോകകപ്പിലെ ഏറ്റവും പ്രധാനപ്പെട്ട താരം മെസിയാണെന്ന് എല്ലാവരും പറയുന്നു. എന്നാൽ മാർട്ടിനെസ് കാരണമാണ് അർജന്റീന ലോകകപ്പ് നേടിയത്. അവൻ ഇല്ലായിരുന്നെങ്കിൽ അർജന്റീന ലോകകപ്പ് നേടില്ലായിരുന്നു. ഇതാണ് യാഥാർത്ഥ്യം. ആളുകൾ എന്തൊക്കെയാണ് ചിന്തിക്കുന്നത് കേൾക്കാൻ ഞാൻ ആഗ്രഹിക്കുന്നുണ്ട്. എന്നാൽ ഞാൻ കണ്ടതും എനിക്ക് മനസിലായതുമാണ് ഞാൻ പറയുന്നത്. അതുകൊണ്ട് തന്നെയാണ് ആളുകൾ എന്നെക്കുറിച്ച് ചർച്ച ചെയ്യുന്നത്''ഹ്യുഗോ ഗാട്ടി

ലോകകപ്പ് ഫൈനലിൽ ഫ്രാൻസിനെ പെനാല്ടിയിൽ വീഴ്ത്തിയാണ് അർജന്റീന തങ്ങളുടെ ചരിത്രത്തിലെ മൂന്നാം ലോക കിരീടം ചൂടിയത്. ടൂർണമെന്റിൽ അർജന്റീനയുടെ ഗോൾ മുഖത്ത് തകർപ്പൻ സേവുകൾ നടത്തികൊണ്ട് മാർട്ടിനസ് തിളങ്ങിയിരുന്നു. ഫൈനലിൽ ഫ്രാൻസും അർജന്റീനയും മൂന്ന് ഗോളുകൾ വീതം നേടി തുല്യത പാലിച്ചപ്പോൾ മത്സരം പെനാൽറ്റി വിധിയെഴുതുകയായിരുന്നു.

പെനാല്ടിയിൽ തകർപ്പൻ പ്രകടനം നടത്തി മാർട്ടിനസ് അർജന്റീനക്ക് ലോകകപ്പ് നേടികൊടുക്കുകയായിരുന്നു. ഫൈനലിൽ എക്സ്ട്രാ ടൈമിൽ ഫ്രഞ്ച് താരം റാൻഡൽ കൊളോ മുവാനിയുടെ ഗോളെന്ന് ഉറപ്പിച്ച ഷോറൂം മാർട്ടിനസ് അവിശ്വസനീയമായി രക്ഷപ്പെടുത്തുകയായിരുന്നു. ക്വാർട്ടർ ഫൈനലിൽ നെതർലാൻഡ്സിനെതിരെയും പെനാൽറ്റിയിൽ അർജന്റീനയെ വിജയിപ്പിച്ചത് മാർട്ടിനസ് തന്നെയാണ്. 

മെസിയും ലോകകപ്പിൽ മികച്ച പ്രകടനം തന്നെയാണ് പുറത്തെടുത്തത്. ടൂർണമെന്റിൽ ഏഴ് മത്സരങ്ങളിൽ നിന്നും ഏഴ് ഗോളുകളാണ് മെസി അടിച്ചുകൂട്ടിയത്. മാത്രമല്ല മൂന്ന് തവണ തന്റെ സഹതാരങ്ങളെ കൊണ്ട് ഗോളടിപ്പിക്കാനും മെസിക്ക് സാധിച്ചു. ഈ മിന്നും പ്രകടനങ്ങൾക്ക് പിന്നാലെ ലോകകപ്പിലെ മികച്ച താരമായും മെസി തെരഞ്ഞെടുക്കപ്പെട്ടു. 

ലോകകപ്പിൽ ആദ്യ മത്സരത്തിൽ തന്നെ ലയണൽ സ്കലോണിയും സംഘവും പരാജയപ്പെട്ടിരുന്നു. സഊദി അറേബ്യാ ഒന്നിനെതിരെ രണ്ട് ഗോളുകൾക്കായിരുന്നു അർജന്റീനയെ തോൽപ്പിച്ചത്. എന്നാൽ പിന്നീടുള്ള മത്സരങ്ങളിൽ വിജയിച്ചുകൊണ്ട് അർജന്റീന നീണ്ട വർഷക്കാലത്തെ കിരീട വരൾച്ച അവസാനിപ്പിക്കുകയായിരുന്നു.  

Former Argentina goal keeper praises emiliano martnez performance in 2022 fifa world cup