ടെൽഅവീവ്: ഇസ്‌റാഈലിൽ സൈന്യത്തിൽ ചേരാൻ വിസമ്മതിക്കുന്നവരുടെ എണ്ണം വലിയ തോതിൽ വർധിച്ചതായി റിപ്പോർട്ട്. 18 വയസിനു മുകളിലുള്ളവർക്ക് സൈനിക സേവനം നിർബന്ധമുള്ള രാജ്യമാണെങ്കിലും സൈനിക സേവനത്തിന് ഹാജരാകാതിരിക്കുന്നവരുടെ എണ്ണത്തിൽ വൻ വർധനയുണ്ടായതായി ഇസ്‌റാഈലിലെ ഇടതുപക്ഷ മാഗസിനായ  972 പറയുന്നു. 

2023 ഒക്ടോബർ 7ന് ഹമാസ് മിന്നലാക്രമണം നടത്തിയതോടെ ആളുകൾ സൈന്യത്തിൽ ചേരാൻ ആവേശം പ്രകടിപ്പിച്ചെങ്കിലും വെടിനിർത്തൽ കരാർ ലംഘിച്ച് ഗസ്സയിൽ ആക്രമണം പുനരാരംഭിച്ചതോടെ സൈനികസേവനത്തിന് ജനങ്ങൾ മടിക്കുകയാണെന്നാണ് റിപ്പോർട്ട്. 2023 ഒക്ടോബർ 7ന് സൈന്യത്തിലെ ഹാജർ 120 ശതമാനമായിരുന്നത് ഇപ്പോൾ 80 ശതമാനത്തിലേക്ക് കുറഞ്ഞതായി സൈന്യം സമ്മതിക്കുന്നു. ദേശീയ മാധ്യമമായ കാൻ റിപ്പോർട്ട് പ്രകാരം നിലവിൽ സൈന്യത്തിലെ ഹാജർ 60 ശതമാനമായി ഇടിഞ്ഞിരിക്കുകയാണ്. 50 ശതമാനമാണെന്നും അതിലും താഴെയാണെന്നും വേറെ ചില റിപ്പോർട്ടുകളിൽ പറയുന്നു. ഇതോടെ ചില റിസർവ് സൈനിക യൂനിറ്റുകൾ സമൂഹമാധ്യമം വഴി സൈന്യത്തിൽ ആളെ ചേർക്കാൻ ശ്രമിച്ചുവരുകയാണ്. 

1982ലെ ആദ്യ ലബനാൻ യുദ്ധത്തിനു ശേഷം സൈന്യത്തിൽ ചേരാൻ ആളുകൾ വിസമ്മതിക്കുന്നത് ഇത്രത്തോളം വർധിക്കുന്നത് ആദ്യമായാണെന്ന് റഫ്യൂസൽ മൂവ്‌മെന്റായ യെഷ് ഗ്വൽ നേതാവ് ഇഷായ് മെനുച്ചിൻ പറയുന്നു. സൈന്യം ആവശ്യപ്പെട്ടാൽ 40 വയസു വരെ സേവനം ചെയ്യൽ ഇസ്‌റാഈലിൽ നിർബന്ധമാണ്. 

ഈ റിസർവ് സേനയെയാണ് യുദ്ധവേളയിൽ സൈന്യം കൂടുതലായി ആശ്രയിക്കുന്നത്.ഗസ്സ യുദ്ധം ആരംഭിച്ചപ്പോൾ മൂന്നു ലക്ഷത്തോളം റിസർവ് സൈനികരെയാണ് സൈന്യം റിക്രൂട്ട് ചെയ്തത്. സ്ഥിരം സൈനികർ ഒരു ലക്ഷമേയുള്ളൂവെന്നിരിക്കെയാണിത്. 60 ശതമാനത്തോളം റിസർവ് സൈനികർ സൈനിക സേവനത്തിന് വിസമ്മതിക്കുന്നു എന്നതിനർഥം ഒരുലക്ഷത്തോളം പേർ സൈനിക സേവനത്തിന് ഹാജരാകാൻ വിസമ്മതിച്ചുവെന്നാണ്. ഇത് സൂചിപ്പിക്കുന്നത് സർക്കാരിന് യുദ്ധം ഇനി തുടരാനാകില്ലെന്നാണ്- മെനുച്ചിൻ ചൂണ്ടിക്കാട്ടുന്നു.

ഇസ്‌റാഈൽ സൈന്യത്തിൽ ചേരാൻ വിസമ്മതിക്കുന്നവരുടെ എണ്ണം നാൾക്കുനാൾ വർധിച്ചുവരുകയാണെന്ന് ഐ.ഡി.എഫ് ടാങ്കിൽ നിന്നും പിടികൂടി ഹമാസ് ബന്ദിയാക്കിയ മറ്റൻ ആൻഗ്രറ്റിന്റെ മാതാവ് അനറ്റ് ആൻഗ്രറ്റ് പറയുന്നു. ഇസ്‌റാഈലി പൗരത്വം ആഗ്രഹിക്കുന്നവരും കുറഞ്ഞുവരുന്നതായി അവർ ചൂണ്ടിക്കാട്ടി. നിലവിൽ 58 ബന്ദികളാണ് ഹമാസിന്റെ പിടിയിൽ അവശേഷിക്കുന്നത്.

Over 100,000 Israeli reservists have reportedly refused to report for duty, marking the largest wave of draft refusals in decades. This growing dissent reflects widespread fatigue and disillusionment with the ongoing war in Gaza, with many reservists citing ethical concerns and personal hardships. The refusal movement spans various sectors, including infantry, intelligence, and medical units. While some refusers face legal consequences, such as imprisonment, others continue to protest against the war's objectives and duration. This internal dissent poses significant challenges to the Israeli government's ability to sustain its military operations in Gaza.