കണ്ണൂര്‍: കണ്ണൂരിൽ മാട്ടൂൽ പഞ്ചായത്ത് പ്രസിഡന്റ് ഫാരിഷ ആബിദിന് ലഹരി മാഫിയയുടെ ഭീഷണി. പഞ്ചായത്ത് പ്രസിഡന്റിന് നേരെയുണ്ടായ ഭീഷണിയെ തുടർന്ന് ഫാരിഷ ആബിദ് നൽകിയ പരാതിയിൽ പഴയങ്ങാടി പൊലീസ് കേസെടുത്തു. പഞ്ചായത്ത് പരിധിയിൽ പ്രത്യേക സ്‌ക്വാഡ് രൂപീകരിച്ച് ലഹരി വിൽപ്പനക്കാരുടെ വിവരങ്ങൾ പൊലീസിന് കൈമാറിയതാണ് ലഹരി സംഘത്തെ പ്രകോപിപ്പിച്ചത്.

നാട്ടിൽ ലഹരി മാഫിയ പിടിമുറുക്കിയതോടെ, ജനകീയ പ്രതിരോധം തീർക്കാൻ മാട്ടൂൽ പഞ്ചായത്ത് തീരുമാനിച്ചു. മാടായി, മാട്ടൂൽ പഞ്ചായത്തുകളിലെ യുവജനങ്ങളെ സംഘടിപ്പിച്ച് ‘ധീര’ എന്ന പേര് നൽകി ഒരു വാട്‌സ്ആപ്പ് കൂട്ടായ്മ രൂപീകരിച്ചു. ഈ കൂട്ടായ്മയിൽ 800-ലധികം അംഗങ്ങളുണ്ട്. ലഹരി വിൽക്കുന്നവരെയും ഉപയോഗിക്കുന്നവരെയും കണ്ടെത്താൻ സംഘവും പൊലീസും സംയുക്തമായി പരിശോധന നടത്തിയതോടെ, അടുത്ത കാലത്ത് 15 ലഹരി വിൽപ്പനക്കാരെ പൊലീസിന് പിടികൂടാൻ കഴിഞ്ഞു. ലഹരി സംഘങ്ങൾ തമ്പടിക്കുന്ന പഴയ കെട്ടിടങ്ങൾ പലതും ‘ധീര’യുടെ പ്രവർത്തകർ ഇടിച്ചുനിരത്തുകയും ചെയ്തു.
ഇതിന് പിന്നാലെയാണ് ലഹരി സംഘങ്ങളിൽ നിന്ന് ഭീഷണി ഉയർന്നത്.

എത്ര വലിയ കേസായാലും പെട്ടെന്ന് ഊരിപ്പോകുമെന്നും, അങ്ങനെ പുറത്തിറങ്ങുന്നവർ പിന്നീട് സമൂഹമാധ്യമങ്ങളിലൂടെയും ഫോൺ കോളുകളിലൂടെയും ഭീഷണിപ്പെടുത്തുകയാണെന്നും പഞ്ചായത്ത് പ്രസിഡന്റ് ഫാരിഷ ആബിദ് പറയുന്നു. വീട്ടിലുള്ളവർക്ക് പണി തരാമെന്നും കുട്ടികളെ അപകടപ്പെടുത്തുമെന്നും ഉൾപ്പെടെയാണ് ഭീഷണിയെന്ന് അവർ വ്യക്തമാക്കി. ലഹരി മാഫിയ നാട്ടിൽ പിടിമുറുക്കുന്നുവെന്ന് മനസ്സിലാക്കിയതോടെയാണ് പ്രസിഡന്റും സംഘവും ഇതിനെതിരെ പോരാടാൻ ഇറങ്ങിയത്. ലഹരി വിരുദ്ധ പ്രവർത്തനങ്ങൾക്ക് നേതൃത്വം നൽകുന്ന പഞ്ചായത്ത് പ്രസിഡന്റ് ഫാരിഷ ടീച്ചർക്കെതിരെ ലഹരി സംഘം ആദ്യം സൈബർ ആക്രമണം അഴിച്ചുവിട്ടു. എന്നാൽ, ലഹരിക്കെതിരായ പോരാട്ടം തുടരാനാണ് ഫാരിഷ ആബിദിന്റെ ഉറച്ച തീരുമാനം.