ദുബൈ: മാര്‍ച്ച് 23ന് നടന്ന ഹോട്ട്-എയര്‍ ബലൂണ്‍ അപകടത്തില്‍ മരണമൊന്നും സംഭവിച്ചിട്ടില്ലെന്ന് ദുബൈ പൊലിസ് സ്ഥിരീകരിച്ചു. ഒരു റഷ്യന്‍ വിനോദസഞ്ചാരിയും മാതാവും മരുഭൂമിക്ക് മുകളിലൂടെ ബലൂണ്‍ സവാരി ചെയ്യുന്നതിന്റെയും രണ്ട് പേര്‍ മരിച്ചുവെന്ന് അവകാശപ്പെടുന്ന റിപ്പോര്‍ട്ടുകളും വീഡിയോയും വൈറലായതിനെ തുടര്‍ന്നാണ് ദുബൈ പൊലിസിന്റെ വിശദീകരണം.

2025 മാര്‍ച്ച്23 ന് ദുബൈയില്‍ നടന്ന ഹോട്ട് എയര്‍ ബലൂണ്‍ അപകടത്തില്‍ മരണമൊന്നും സംഭവിച്ചിട്ടില്ലെന്ന് ദുബൈ മീഡിയ ഓഫീസില്‍ നിന്നുള്ള പ്രസ്താവനയില്‍ ദുബൈ പൊലിസ് വ്യക്തമാക്കി. സംഭവവുമായി ബന്ധപ്പെട്ട് മാധ്യമങ്ങളില്‍ പ്രചരിക്കുന്ന ചില റിപ്പോര്‍ട്ടുകള്‍ തെറ്റിദ്ധരിപ്പിക്കുന്നതുമാണെന്നും പൊലിസ് പറഞ്ഞു.

സംഭവത്തെത്തുടര്‍ന്ന് വിനോദസഞ്ചാരികള്‍ക്ക് പരുക്കേറ്റെന്നും ഇവര്‍ക്ക് ഉടനടി വൈദ്യസഹായം ലഭ്യമാക്കിയെന്നും പൊലിസ് പറഞ്ഞു. അപകടത്തില്‍ ഉള്‍പ്പെട്ട വ്യക്തികള്‍ വിവിധ രാജ്യങ്ങളില്‍ നിന്നുള്ളവരാണ്.

ലാന്‍ഡിംഗിനിടെ കാലാവസ്ഥ മോശമായതിനാലാണ് അപകടം നടന്നതെന്നാണ് പ്രാഥമിക സൂചന. നിലവില്‍ സമഗ്രമായ അന്വേഷണം നടന്നുകൊണ്ടിരിക്കുകയാണ്.

സ്ഥിരീകരിക്കാത്ത വിവരങ്ങള്‍ ഷെയര്‍ ചെയ്യുന്നത് ഒഴിവാക്കണമെന്നും അനാവശ്യമായ ആശങ്കകളും ആശയക്കുഴപ്പങ്ങളും ഒഴിവാക്കാന്‍ കൃത്യമായ അപ്ഡേറ്റുകള്‍ക്കായി ഔദ്യോഗിക ഉറവിടങ്ങളെ ആശ്രയിക്കണമെന്നും ദുബൈ പൊലിസ് പൊതുജനങ്ങളോടും മാധ്യമങ്ങളോടും അഭ്യര്‍ത്ഥിച്ചു.

Dubai Police have dismissed viral propaganda claiming a fatality in a hot air balloon accident. Officials confirmed no deaths occurred and urged the public to rely on verified sources, warning against spreading misinformation on social media platforms.