ഡല്‍ഹി: തമിഴ്‌നാട് ഗവര്‍ണര്‍ക്ക് തിരിച്ചടി. ബില്ലുകള്‍ വൈകിപ്പിച്ച തമിഴ്‌നാട് ഗവര്‍ണറുടെ നടപടി നിയമ വിരുദ്ധമെന്ന് സുപ്രിം കോടതി ചൂണ്ടിക്കാട്ടി. ബില്ലുകളില്‍ മൂന്നുമാസത്തിനകം തീരുമാനമെടുക്കണമെന്നും സുപ്രിം കോടതി ഉത്തരവിട്ടു. ഗവര്‍ണര്‍ ആര്‍.എന്‍ രവിക്കെതിരെ തമിഴ്‌നാട് സര്‍ക്കാര്‍ നല്‍കിയ ഹരജിയിലാണ് കോടതി ഉത്തരവ്. 

സഭ പാസാക്കിയ ബില്ലുകള്‍ പിടിച്ചുവെക്കാന്‍ ഗവര്‍ണര്‍ക്ക് അധികാരമില്ലെന്ന് കോടതി ചൂണ്ടിക്കാട്ടി. നിയമസഭ പാസാക്കിയ ബില്ലുകള്‍ പിടിച്ചുവെക്കുകയും തിരിച്ചയക്കുകയും ചെയ്യുന്ന ഗവര്‍ണര്‍മാരുടെ നടപടിക്ക് തടയിടുകയാണ് സുപ്രിം കോടതി ഉത്തരവിലൂടെ.  രാഷ്ട്രപതിയുടെ അംഗീകാരത്തിനായി പത്ത് ബില്ലുകള്‍ മാറ്റിവെച്ചത് നിയമവിരുദ്ധമാണ്. 

രാഷ്ട്രപതിക്ക് വിട്ട ബില്ലുകള്‍ റദ്ദാക്കേണ്ടതാണെന്ന് നിരീക്ഷിച്ച കോടതി സഭ രണ്ടാമതും പാസാക്കിയ ബില്ലിന്‍മേല്‍ ഒരുമാസത്തിനകം തീരുമാനമെടുക്കണമെന്നും  കോടതി ചൂണ്ടിക്കാട്ടി. 

ഗവര്‍ണര്‍ സര്‍ക്കാരിന്റെ ഉപദേശം അനുസരിച്ച് പ്രവര്‍ത്തിക്കണമെന്നും സുപ്രിം കോടതി ചൂണ്ടിക്കാട്ടി. 
അനുഛേദം 200 അനുസരിച്ച് ഗവര്‍ണറുടെ വിവേചനാധികാരം എന്ന ഒന്നില്ലെന്നും കോടതി ചൂണ്ടിക്കാട്ടി. അനുഛേദം 200 പ്രകാരം നടപടികളില്‍ ഒന്ന് സ്വീകരിച്ചേ മതിയാകൂ എന്നും കോടതി വ്യക്തമാക്കി.