ഗസ്സ: ഗസ്സയില്‍ ആക്രമണം ശക്തമായി തുടര്‍ന്ന് ഇസ്‌റാഈല്‍. മാധ്യമപ്രവര്‍ത്തകരുടെ ടെന്റിന് നേരെ ഇസ്റാഈല്‍ വ്യോമാക്രമണം. രണ്ടു മാധ്യമപ്രവര്‍ത്തകര്‍ കൊല്ലപ്പെട്ടു. തെക്കന്‍ ഗസ്സയിലെ ഖാന്‍ യൂനിസിലെ നാസര്‍ ആശുപത്രി വളപ്പിലെ ടെന്റിനു നേരെയാണ് ആക്രമണം നടന്നത്. ഒമ്പത് മാധ്യമ പ്രവര്‍ത്തകര്‍ക്ക് പരുക്കേറ്റതായി പ്രാദേശിക ജേണലിസ്റ്റ് യൂനിയന്‍ അറിയിച്ചു. ആക്രമണത്തില്‍ ടെന്റ് കത്തിയെരിഞ്ഞു. ഇതിന്റെ വിഡിയോ സമൂഹ മാധ്യമങ്ങളില്‍ പ്രചരിക്കുന്നുണ്ട്. മാധ്യമങ്ങളെ ഭയപ്പെടുത്താനാണ് ശ്രമമെന്ന് ഫലസ്തീന്‍ വിദേശകാര്യ മന്ത്രാലയം പ്രതികരിച്ചു.

ഫലസ്തീനി മാധ്യമപ്രവര്‍ത്തകരാണ് കൊല്ലപ്പെട്ടത്. ഇതിലൊരാള്‍ ഹസന്‍ അസ് ലിഹ് എന്ന പ്രമുഖ ഫലസ്തീനി ജേണലിസ്റ്റാണ്. ഇദ്ദേഹം ഹമാസ് പ്രവര്‍ത്തകനാണെന്നും മാധ്യമങ്ങള്‍ക്കിടയില്‍ പ്രവര്‍ത്തിക്കുകയായിരുന്നുവെന്നും ഇസ്റാഈല്‍ സൈന്യം ആരോപിച്ചു. പരുക്കേറ്റ മാധ്യമ പ്രവര്‍ത്തകരില്‍ ചിലരുടെ നില ഗുരുതരമാണ്.

എന്നാല്‍, അസ്‌ലിഹിന് രാഷ്ട്രീയബന്ധമുണ്ടെന്ന പ്രചാരണം തെറ്റെന്ന് ഗസ്സ സര്‍ക്കാര്‍ മീഡിയ ഓഫിസ് അറിയിച്ചു. ഹെല്‍മി അല്‍ ഫവാഖി ആണ് കൊല്ലപ്പെട്ട രണ്ടാമത്തെ മാധ്യമപ്രവര്‍ത്തകന്‍. കൊല്ലപ്പെട്ട മാധ്യമപ്രവര്‍ത്തകരുടെ ഖബറടക്ക ചടങ്ങില്‍ പ്രദേശത്തെ മാധ്യമപ്രവര്‍ത്തകരെല്ലാം പങ്കെടുത്തു. ഒക്ടോബര്‍ 2023 മുതല്‍ ഗസ്സയില്‍ കൊല്ലപ്പെട്ട മാധ്യമപ്രവര്‍ത്തകരുടെ എണ്ണം 210 ആയതായി ഫലസ്തീനിയന്‍ ജേണലിസ്റ്റ് സിന്‍ഡിക്കേറ്റ് അറിയിച്ചു.