കോയമ്പത്തൂർ: കോയമ്പത്തൂരിലെ സ്വകാര്യ സ്കൂളിൽ പരീക്ഷയ്ക്കിടെ ദളിത് പെൺകുട്ടിയെ ആർത്തവം കാരണം ക്ലാസ് മുറിക്ക് പുറത്ത് ഇരുത്തിയതായി പരാതി. സംഭവത്തിൽ വൻ പ്രതിഷേധം ഉയർന്നിട്ടുണ്ട്. സ്വാമി ചിദ്ഭവന്ദ മെട്രിക്കുലേഷൻ ഹയർ സെക്കൻഡറി സ്കൂളിലെ എട്ടാം ക്ലാസ് വിദ്യാർത്ഥിനിയായ പട്ടികജാതി (അരുന്ധതിയാർ) പെൺകുട്ടിയെ ഏപ്രിൽ 7, 9 തീയതികളിൽ നടന്ന പരീക്ഷകൾക്കിടെ ക്ലാസ് മുറിക്ക് പുറത്തുള്ള പടിക്കെട്ടിൽ ഇരുത്തി പരീക്ഷ എഴുതിപ്പിക്കുകയായിരുന്നു. കിണത്തുകടവ് താലൂക്കിനടുത്തുള്ള സെങ്കുട്ടായിപാളയം ഗ്രാമത്തിലെ സ്കൂളിൽ പഠിക്കുന്ന പ്രായപൂർത്തിയാകാത്ത പെൺകുട്ടിയെ ഈ വിധത്തിൽ പരീക്ഷ എഴുതുന്നതിൽ വിലക്കിയത്.

പെൺകുട്ടിയുടെ അമ്മ വീഡിയോ പകർത്തി വിദ്യാഭ്യാസ ഉദ്യോഗസ്ഥരെ സമീപിച്ചതിനെ തുടർന്നാണ് സംഭവം പുറത്തുവന്നത്. വീഡിയോയിൽ പെൺകുട്ടി പറയുന്നത്, തനിക്ക് ആർത്തവമുണ്ടെന്നും ക്ലാസ് ടീച്ചറും പ്രിൻസിപ്പലും അറിഞ്ഞതിന് ശേഷം ഇരുവരും ചേർന്ന് തന്നെ ക്ലാസ് മുറിക്ക് പുറത്ത് പടിക്കെട്ടിൽ ഇരുത്തി പരീക്ഷ എഴുതിപ്പിക്കാൻ നിർബന്ധിച്ചുവെന്നാണ്. "ഇത് ആദ്യമല്ല; ഏപ്രിൽ 7നും ഇതേ രീതിയിൽ പരീക്ഷ എഴുതേണ്ടി വന്നിട്ടുണ്ട്," എന്നും അവൾ കൂട്ടിച്ചേർത്തു. വീഡിയോയിൽ പശ്ചാത്തലത്തിൽ പെൺകുട്ടിയുടെ അമ്മ എന്ന് കരുതപ്പെടുന്ന ഒരു സ്ത്രീയുടെ വേദനയുള്ള ചോദ്യം കേൾക്കാം: "ആർക്കെങ്കിലും ആർത്തവം വന്നാൽ, അവർക്ക് ക്ലാസ് മുറിക്കുള്ളിൽ ഇരുന്ന് പരീക്ഷ എഴുതാനാകില്ല എന്നാണോ നിയമം? അവർ റോഡിൽ ഇരുന്ന് എഴുതണോ?"

സംഭവത്തിന്റെ വീഡിയോ സോഷ്യൽ മീഡിയയിൽ വൈറലായതോടെ കോയമ്പത്തൂർ റൂറൽ പോലീസ് അന്വേഷണം ആരംഭിച്ചു. ജില്ലാ വിദ്യാഭ്യാസ ഓഫീസർ (ഡിഇഒ) സ്കൂൾ മാനേജ്മെന്റിന് കാരണം കാണിക്കൽ നോട്ടീസ് അയച്ചിട്ടുണ്ട്. അന്വേഷണം പൂർത്തിയാകുന്നതിന് ശേഷം നിയമപ്രകാരം കർശന നടപടി സ്വീകരിക്കും, എന്ന് കോയമ്പത്തൂർ ജില്ലാ കളക്ടർ ജി പവൻകുമാർ വ്യക്തമാക്കി. എന്നാൽ, സ്കൂൾ മാനേജ്മെന്റ് ഇതുവരെ ഈ വിഷയത്തിൽ ഒരു പ്രതികരണവും പുറത്തുവിട്ടിട്ടില്ല.

അതേസമയം, ഗ്രാമവാസികൾ ഒരു സംഘം പൊള്ളാചി സബ് കളക്ടറെ സമീപിച്ചു. സ്കൂൾ മാനേജ്മെന്റിനെതിരെ വിവേചനത്തിന് കർശന നടപടി എടുക്കാൻ ആവശ്യപ്പെട്ടു. സംഭവം വലിയ ചർചയ്ക്ക് വിധേയമായിരിക്കെ, തമിഴ്‌നാട്ടിലെ ചില ഭാഗങ്ങളിൽ ഇപ്പോഴും ആർത്തവവുമായി ബന്ധപ്പെട്ട 'അശുദ്ധി' എന്ന പുരാതനമായ വിശ്വാസം പിന്തുടരുന്നത് ശ്രദ്ധേയമാണ്. ഇതിന്റെ ഭാഗമായി നിരവധി പെൺകുട്ടികൾ ഇത്തരം വിവേചനങ്ങൾ നേരിടുന്നുണ്ടെന്നും ഗ്രാമവാസികൾ സൂചിപ്പിക്കുന്നു.