ദുബൈ: വിമാനത്താവളത്തില്‍ വെച്ച് നഷ്ടമായ ബാഗ് വെറും മുപ്പത് മിനുട്ടിനുള്ളില്‍ കണ്ടെത്തി ദുബൈ പൊലിസ്. ദുബൈ അന്താരാഷട്ര വിമാനത്താവളത്തില്‍ വെച്ചാണ് ബാഗ് നഷ്ടമായത്. 102,000 ദിര്‍ഹവും പാസ്‌പോര്‍ട്ടുമടങ്ങിയ ബാഗാണ് പൊലിസ് തിരച്ചിലില്‍ ലഭിച്ചത്. 

കുടുംബത്തിലെ ഒരംഗം മരിച്ചുവെന്ന വാര്‍ത്തയെത്തുടര്‍ന്ന് തിരിച്ച് കുവൈറ്റിലേക്ക് മടങ്ങാനിരുന്ന സഹോദരങ്ങളുടെ ബാഗാണ് കാണാതായത്. കൃത്യസമയത്ത് തിരിച്ചെത്താന്‍ റിട്ടേണ്‍ ടിക്കറ്റ് ബുക്ക് ചെയ്യാനും വിമാനത്തില്‍ കയറാനുമുള്ള തിരക്കിനിടയില്‍, പണവും പാസ്പോര്‍ട്ടുകളും മറ്റ് സ്വകാര്യ വസ്തുക്കളും നിറഞ്ഞ ബാഗ് നഷ്ടപ്പെടുകയായിരുന്നു.

വിമാനത്തില്‍ കയറിയപ്പോഴാണ് ബാഗ് നഷ്ടപ്പെട്ട കാര്യം ഇവര്‍ മനസ്സിലാക്കിയത്. വിമാനത്താവളത്തില്‍ തങ്ങളെ കൊണ്ടുവന്നുവിട്ട സഹോദരിയെ ഇവര്‍ പെട്ടെന്ന് വിവരം അറിയിച്ചു.

തുടര്‍ന്ന് ഇവരുടെ സഹോദരിയാണ് ബാഗ് നഷ്ടപ്പെട്ട വിവരം വിമാനത്താവളത്തിലെ പൊലിസ് ഓഫീസില്‍ അറിയിച്ചത്.

വിവരം ലഭിച്ച ഉടനെ ദുബൈ പൊലിസിലെ പ്രത്യേക സംഘം ബാഗ് വേഗത്തില്‍ കണ്ടെത്തുകയും വെറും 30 മിനുട്ടിനുള്ളില്‍ അവരുടെ സഹോദരിയെ ഏല്‍പ്പിക്കുകയും ചെയ്തതായി ജനറല്‍ ഡിപ്പാര്‍ട്ട്മെന്റ് ഓഫ് എയര്‍പോര്‍ട്ട് സെക്യൂരിറ്റി ഡയറക്ടര്‍ ബ്രിഗേഡിയര്‍ ഹമൂദ ബെല്‍സുവൈദ അല്‍ അമേരി പറഞ്ഞു.

ഇത്തരം കേസുകള്‍ കാര്യക്ഷമമായും കൃത്യമായും കൈകാര്യം ചെയ്യുന്ന 'ലോസ്റ്റ് ആന്‍ഡ് ഫൗണ്ട്' ടീമിന്റെ വൈദഗ്ധ്യത്തെയും അദ്ദേഹം എടുത്തുപറഞ്ഞു. മുന്‍കാലങ്ങളില്‍ വസ്തുക്കള്‍ നഷ്ടപ്പെട്ടതായി ഉടമകള്‍ തിരിച്ചറിയുന്നതിനു മുമ്പുതന്നെ ദുബൈ പൊലിസ് തിരിച്ചറിഞ്ഞിട്ടുണ്ട്.

ദുബൈ വിമാനത്താവളങ്ങളില്‍ ഉയര്‍ന്ന നിലവാരത്തിലുള്ള സുരക്ഷ നിലനിര്‍ത്തുന്നതിനുള്ള ദുബൈ പൊലിസിന്റെ പ്രതിബദ്ധത അല്‍ അമേരി ആവര്‍ത്തിച്ച് വ്യക്തമാക്കി.

A passenger forgot a bag with Rs 24 lakh and a passport at the airport. Dubai Police swiftly located and returned the bag within 30 minutes, showcasing their efficiency and commitment to passenger safety and lost item recovery.