പത്തനംതിട്ട: കോവിഡ് രോഗിയായ യുവതിയെ ആംബുലന്‍സില്‍ പീഡിപ്പിച്ച കേസില്‍ പ്രതിയായ ആംബുലന്‍സ് ഡ്രൈവര്‍ നൗഫലിന് ജീവപര്യന്തം തടവ് ശിക്ഷ വിധിച്ചു. കായംകുളം സ്വദേശിയായ നൗഫലിനെ പത്തനംതിട്ട പ്രിന്‍സിപ്പല്‍ സെഷന്‍സ് കോടതിയാണ് ശിക്ഷ വിധിച്ചത്. ജീവപര്യന്തം തടവിന് പുറമേ, പ്രതി 1,08,000 രൂപ പിഴയും അടയ്ക്കണമെന്ന് കോടതി ഉത്തരവിട്ടു. ആറു വകുപ്പുകളിലായി നല്‍കിയ കുറ്റങ്ങള്‍ തെളിഞ്ഞതിനെ തുടര്‍ന്നാണ് ശിക്ഷ വിധിച്ചത്. തട്ടിക്കൊണ്ടുപോകല്‍, ബലാത്സംഗം എന്നിവയടക്കമുള്ള ഗുരുതര കുറ്റങ്ങള്‍ നൗഫലിനെതിരെ തെളിഞ്ഞിരുന്നു.

2020 സെപ്റ്റംബര്‍ അഞ്ചിന് രാത്രി ആറന്മുളയില്‍ വച്ചാണ് സംഭവം നടന്നത്. അര്‍ധരാത്രിയില്‍ വിജനമായ സ്ഥലത്ത് യുവതിയെ പീഡിപ്പിച്ച പ്രതി, അടൂരില്‍നിന്നും പന്തളത്തെ ആശുപത്രിയിലേക്ക് കൊണ്ടുപോകുന്നതിനിടെയാണ് കുറ്റകൃത്യം നടത്തിയത്. യാത്രാ മാര്‍ഗം ഉദ്ദേശപൂര്‍വം മാറ്റി ആറന്മുളയിലെ ആളൊഴിഞ്ഞ ഗ്രൗണ്ടിലെത്തിച്ചാണ് പ്രതി യുവതിയെ ഉപദ്രവിച്ചത്. ആക്രമണ സമയത്ത് പെണ്‍കുട്ടിയുടെ വയസ് 19 മാത്രമായിരുന്നു. കോവിഡ് രോഗബാധിതയായി അവശയായിരുന്ന പെണ്‍കുട്ടി പീഡനത്തിനിരയായതിനെ തുടര്‍ന്ന് ഗുരുതരാവസ്ഥയിലായി.

കേസില്‍ വിശദമായ തെളിവുകള്‍ മൊബൈല്‍ ഫോണിലൂടെ ശേഖരിച്ചാണ് പെണ്‍കുട്ടി പൊലിസില്‍ പരാതി നല്‍കിയത്. രാജ്യത്ത് ആദ്യമായി പട്ടികജാതി/വര്‍ഗ പീഡന നിരോധന നിയമപ്രകാരം സാക്ഷി വിസ്താരം പൂര്‍ണമായും വിഡിയോ റെക്കോര്‍ഡ് ചെയ്യാന്‍ ഹൈക്കോടതി ഉത്തരവിട്ട കേസുകൂടിയാണിത്. പ്രതിയുടെ കരുതിക്കൂട്ടിയുള്ള ശ്രമങ്ങളും കേസിന്റെ ഭാഗമായി തെളിഞ്ഞു.