ദോഹ: കിഴക്കന്‍ ജറുസലേമില്‍ യുഎന്‍  റിലീഫ് ആന്‍ഡ് വര്‍ക്ക്സ് ഏജന്‍സി ഫോര്‍ ഫലസ്തീന്‍ അഭയാര്‍ത്ഥി (UNRWA) നടത്തുന്ന ആറ് സ്‌കൂളുകള്‍ അടച്ചുപൂട്ടാനുള്ള ഇസ്രായേലി അധിനിവേശ അധികാരികളുടെ തീരുമാനത്തെ ഖത്തര്‍ ശക്തമായി അപലപിച്ചു. 

അധിനിവേശ ഫലസ്തീന്‍ പ്രദേശങ്ങളില്‍ നടന്നുകൊണ്ടിരിക്കുന്ന ഇസ്രായേല്‍ കുറ്റകൃത്യങ്ങളുടെ പരമ്പരയില്‍ കുട്ടികളുടെ വിദ്യാഭ്യാസം നിഷേധിക്കുന്നത് ഒരു പുതിയ കുറ്റകൃത്യമായി കണക്കാക്കാവുന്നതാണെന്നും
വിദ്യാഭ്യാസത്തിലേക്കുള്ള പ്രവേശനം അന്താരാഷ്ട്ര നിയമങ്ങള്‍ അനുശാസിക്കുന്ന മൗലികാവകാശവുമാണെന്ന് വിദേശകാര്യ മന്ത്രാലയം  പുറത്തിറക്കിയ പ്രസ്താവനയില്‍ പറഞ്ഞു. 

വിദ്യാഭ്യാസത്തെ രാഷ്ട്രീയവല്‍ക്കരിക്കുന്നതിനെതിരെ മുന്നറിയിപ്പ് നല്‍കുകയും യുഎന്‍ആര്‍ഡബ്ല്യുഎയുടെ പങ്ക് കുറയ്ക്കാനുള്ള ശ്രമങ്ങളില്‍ ഗൗരവമായ ആശങ്ക പ്രകടിപ്പിക്കുകയും ചെയ്തു. ഇസ്രയേലിനെ ഇതിന് ഉത്തരവാദിയാക്കാനും അന്താരാഷ്ട്ര നിയമ ബാധ്യതകള്‍ പാലിക്കുന്നുണ്ടെന്ന് ഉറപ്പാക്കാനും അടിയന്തിരമായ നടപടികള്‍ കൈക്കൊള്ളണമെന്ന് ഖത്തര്‍ വിദേശ കാര്യ മന്ത്രാലയം അന്താരാഷ്ട്ര സമൂഹത്തോട് ആവശ്യപ്പെട്ടു.

ഫലസ്തീന്‍ ലക്ഷ്യത്തിന് ഖത്തറിന്റെ അചഞ്ചലമായ പിന്തുണ ഉറപ്പിച്ചുകൊണ്ട്, അന്താരാഷ്ട്ര നിയമസാധുതയിലും ദ്വിരാഷ്ട്ര ചട്ടക്കൂടിലും അധിഷ്ഠിതമായ നീതിയും ശാശ്വതവുമായ പരിഹാരത്തിനുള്ള രാജ്യത്തിന്റെ പ്രതിബദ്ധതയെ പ്രസ്താവന അടിവരയിടുന്നു.

Qatar Condemns Israels Closure of Six UNRWA Schools in East Jerusalem.