ലഖ്നൗ: ഉത്തര്‍പ്രദേശിലെ സംഭലില്‍ സ്ഥിതിചെയ്യുന്ന ഷാഹി മസ്ജിദിന് പിന്നാലെ അതിനോടു ചേര്‍ന്നുള്ള ദര്‍ഗയെയും തര്‍ക്കത്തിലേക്ക് വലിച്ചിഴച്ച് ജില്ലാ ഭരണകൂടം. കൈയേറ്റവും വഖ്ഫ് സ്വത്തില്‍ സാമ്പത്തിക ക്രമക്കേടും ആരോപിച്ച് ജില്ലാ ഭരണകൂടം ദര്‍ഗ പരിപാലന കമ്മിറ്റിക്ക് നോട്ടിസയച്ചു. നൂറ്റാണ്ടുകള്‍ പഴക്കമുള്ള ദര്‍ഗ ചന്ദൗസി താലൂക്കിലെ ജനേറ്റ ഗ്രാമത്തിലുള്ള സര്‍ക്കാര്‍ ഭൂമിയിലാണ് സ്ഥിതി ചെയ്യുന്നതെന്നും ഇതിന്റെ രേഖകള്‍ ഹാജരാക്കണമെന്നുമാണ് മുതവല്ലിക്ക് അയച്ച നോട്ടിസില്‍ ആവശ്യപ്പെട്ടിരിക്കുന്നത്. 

പിന്നാലെ, വഖ്ഫ് സ്വത്താണെന്ന് തെളിയിക്കുന്ന രേഖകള്‍ അസ്താന ആലിയ ഖാദിരി നൗഷാഹിയ ദര്‍ഗയുടെ മുതവല്ലി സയ്യിദ് ഷാഹിദ് മിയാന്‍ നല്‍കിയതായി ദര്‍ഗ കമ്മിറ്റി അറിയിച്ചിട്ടുണ്ട്.
സംഭവത്തില്‍ അന്വേഷണം നടത്തിവരികയാണെന്നും ശേഷം ആരുടെ ഭൂമിയിലാണ് ദര്‍ഗ നിര്‍മിച്ചിരിക്കുന്നതെന്ന് വെളിപ്പെടുമെന്നും അധികൃതര്‍ പറഞ്ഞു. രേഖകളില്‍ വഖ്ഫ് ഭൂമിയുടെ ഉടമസ്ഥാവകാശം പ്രഥമദൃഷ്ട്യാ സ്ഥിരീകരിക്കപ്പെട്ടിട്ടില്ലെന്നും ഭൂമി സര്‍ക്കാരിന്റെ ഉടമസ്ഥതയിലുള്ളതാണെന്ന് കണ്ടെത്തിയാല്‍ കര്‍ശന നടപടി സ്വീകരിക്കുമെന്നും ഭരണകൂടം പറയുന്നു. 

ALSO READ: ശംസി ഷാഹി മസ്ജിദ് നിര്‍മിച്ചതും ക്ഷേത്രം പൊളിച്ചെന്ന്; രാജ്യത്തെ ഏറ്റവും പഴക്കമുള്ള മറ്റൊരു പള്ളിയില്‍ കൂടി സംഘ് പരിവാര്‍ അവകാശ വാദം

ദര്‍ഗയുടെ ഭൂമി ഷാഹിദ് മിയാന്‍ നിയമവിരുദ്ധമായി കൈവശപ്പെടുത്തിയെന്നും വ്യാജ മുതവല്ലിയായി മാറി പണം തട്ടിയെടുത്തെന്നും ആരോപിച്ച് ജില്ലാ ഭരണകൂടത്തിന് മുമ്പാകെ ലഭിച്ച പരാതിയിന്‍മേലാണ്, ദര്‍ഗയുടെ ഉടമസ്ഥാവകാശം സംബന്ധിച്ച് ജില്ലാ ഭരണകൂടം അന്വേഷണം തുടങ്ങിയത്. പരാതിപ്രകാരം വ്യാഴാഴ്ച തഹസില്‍ദാര്‍ ധീരേന്ദ്ര പ്രതാപ് സിങ് ഗ്രാമത്തിലെത്തി ദര്‍ഗ സന്ദര്‍ശിച്ചിരുന്നു.

ബാബരി, ഷാഹി ഈദ്ഗാഹ്, സംഭാല്‍.ബദായുനിയിലെ ശംസി ഷാഹി മസ്ജിദുമെല്ലാം ഇത്തരം അവകാശവാദങ്ങളിലൂടെ കടന്നു പോകുകയാണ്. രാജ്യത്തെ ഏറ്റവും പഴക്കമുള്ള മൂന്നാമത്തെ പള്ളിയാണ്  ശംസി ഷാഹി. സംഭല്‍ ഷാഹി മസ്ജിദിനെതിരെ ഹിന്ദുത്വ സംഘടനകള്‍ അവകാശവാദം ഉന്നയിക്കുകയും നിയമനടപടി ആരംഭിക്കുകയും കീഴ്ക്കോടതി സര്‍വേ അനുവദിക്കുകയും ചെയ്തിരുന്നു.