കോഴിക്കോട്: ഉരുള്‍പൊട്ടല്‍ ദുരന്തമുണ്ടായ കോഴിക്കോട് വിലങ്ങാട് നിര്‍മാണപ്രവൃത്തികള്‍ക്ക് വിലക്ക് ഏര്‍പ്പെടുത്തി കലക്ടര്‍. ഇതോടെ പ്രദേശവാസികള്‍ ദുരിതത്തിലായി. ഉരുള്‍പൊട്ടലില്‍ വ്യാസയോഗ്യമല്ലാതായ വീടിനു പകരം വീട് നിര്‍മിക്കാന്‍ തയാറെടുത്തവരുടെ വീട് നിര്‍മാണം നിലച്ചു. ഉരുള്‍പൊട്ടലില്‍ തകര്‍ന്ന റോഡ് നിര്‍മാണപ്രവൃത്തികളെയും വിലക്ക് ബാധിച്ചതായി പരാതിയുണ്ട്. വാണിമേല്‍ പഞ്ചായത്തിലെ 9,10,11 വാര്‍ഡുകളിലെ നിര്‍മാണപ്രവര്‍ത്തനങ്ങള്‍ക്കാണ് കലക്ടര്‍ വിലക്ക് ഏര്‍പ്പെടുത്തിയത്.

പ്രദേശത്ത് നാശംവിതച്ച ജൂലൈ 30ലെ ഉരുള്‍പൊട്ടലില്‍ വിലങ്ങാട്ടെ കുടിപ്പാറ തോമസ് ജോര്‍ജിന്റെ വീടും വാസയോഗ്യമല്ലാതായിരുന്നു. തോമസും കുടുംബവും ദുരിതാശ്വാസ ക്യംപുകളിലാണ് കുറേ ദിവസം കഴിഞ്ഞത്. പിന്നെയാണ് അപകടാവസ്ഥയിലുള്ള വീട്ടിലേക്കു തന്നെ താമസം മാറിയത്.

സര്‍ക്കാരിന്റെ ദുരിതബാധിത ലിസ്റ്റിലും തോമസും കുടുംബവും പെട്ടിട്ടില്ല. സ്ഥലം എംപി ഷാഫി പറമ്പില്‍ നിര്‍മിച്ചു നല്‍കുമെന്ന് പ്രഖ്യാപിച്ച 20 വീടുകളില്‍ തോമസും ഉള്‍പ്പെട്ടു. വീട് നിര്‍മാണപ്രവര്‍ത്തനങ്ങള്‍ തുടങ്ങുന്നതിനു മുന്നോടിയായി കൃഷിസ്ഥലത്തെ മരങ്ങള്‍ മുറിച്ചിരുന്നു. മാത്രമല്ല പാറപൊട്ടിച്ചുമാണ് സ്ഥലമൊരുക്കിയത്. അപ്പോഴാണ് പ്രവൃത്തിതടഞ്ഞുകൊണ്ടുള്ള ജില്ലഭരണകൂടത്തിന്റെ ഉത്തരവ് വന്നിരിക്കുന്നത്.