കോഴിക്കോട്: സംസ്ഥാനത്തിന്റെ വിവിധ ഭാഗങ്ങളില്‍ നിന്നായി പതിനായിരങ്ങള്‍ ഒഴുകിയെത്തി. വഖ്ഫ് നിയമഭേദഗതിക്കെതിരെ മുസ്‌ലിം ലീഗ് സംസ്ഥാന കമ്മിറ്റി സംഘടിപ്പിച്ച മഹാറാലി അക്ഷരാര്‍ത്ഥത്തില്‍ പ്രതിഷേധക്കടലായി മാറി. ഭരണഘടനാ വിരുദ്ധമായ വഖ്ഫ് നിയമഭേദഗതി പിന്‍വലിക്കുക എന്ന ആവശ്യമുയുര്‍ത്തി സംഘടിപ്പിച്ച റാലി മുസ്‌ലിം ലീഗിന്റെ കരുത്തും സംഘാടകമികവും വിളിച്ചോതുന്നതായി. ഉച്ച കഴിഞ്ഞതോടെ കോഴിക്കോട് കടപ്പുറത്തേക്ക് വിവിധ ഭാഗങ്ങളില്‍ നിന്നായി വാഹനങ്ങളില്‍ പ്രവര്‍ത്തകര്‍ ചെറുപ്രകടനങ്ങളായി കടപ്പുറത്തേക്ക് നീങ്ങി.

വൈകീട്ട് മൂന്നരയോടെ ബീച്ചും പരിസരവും ജനനിബിഢമായി. കടപ്പുറം ഉള്‍ക്കൊള്ളാകാത്ത വിധം ജനസഞ്ചയം നീണ്ടു. വഖ്ഫ് നിയമ ഭേദഗതിക്കെതിരെ പ്ലക്കാര്‍ഡുകള്‍ ഉയര്‍ത്തിയും മുദ്രാവാക്യങ്ങള്‍ മുഴക്കിയുമാണ് പ്രവര്‍ത്തകര്‍ റാലിക്കെത്തിയത്. മലയാളത്തിലും ഇംഗ്ലീഷിലും ഹിന്ദിയിലും എഴുതിയ പ്ലക്കാര്‍ഡുകളാണ് പ്രവര്‍ത്തകര്‍ ഉയര്‍ത്തിക്കാട്ടിയത്. പൊതുസമ്മേളനം ആരംഭിക്കുന്നത് വരെ വേദിയില്‍ നിന്ന് മുഴങ്ങിയ മുദ്രാവാക്യം പ്രവര്‍ത്തകര്‍ ഏറ്റുചൊല്ലി. നേരത്തെ നല്‍കിയ മുദ്രാവാക്യങ്ങള്‍ മാത്രമാണ് റാലിയില്‍ മുഴങ്ങിയത്.

സമീപകാലത്തൊന്നുമില്ലാത്തവിധം ഏറ്റവും വലിയ ജനസഞ്ചയത്തെ അണിനിരത്തിയതിലൂടെ വഖ്ഫ് നിയമ ഭേദഗതിക്കെതിരേ ഇന്ത്യയില്‍ നടന്ന ഏറ്റവും വലിയ പ്രതിഷേധമായി മുസ്‌ലിം ലീഗ് റാലി മാറി. വൈകിയെത്തിയവര്‍ക്ക് കടപ്പുറത്തെ സമ്മേളന സ്ഥലത്തേക്ക് എത്താനായില്ല. കടപ്പുറത്തേക്കുള്ള റോഡുകളെല്ലാം റാലിക്കെത്തിയവരെകൊണ്ട് നിറഞ്ഞിരുന്നു. സംസ്ഥാന അധ്യക്ഷന്‍ പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്തു. കര്‍ണാടക മന്ത്രി കൃഷ്ണ ഭൈര ഗൗഡ മുഖ്യപ്രഭാഷണം നടത്തി. ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി അധ്യക്ഷനായി. തെലങ്കാന മന്ത്രി അനസൂയ സീതക്ക മുഖ്യാതിഥിയായി. മുസ്‌ലിംലീഗ് ദേശീയ പ്രസിഡന്റ് പ്രൊഫ. കെ.എം ഖാദര്‍ മൊയ്തീന്‍, ഇ.ടി മുഹമ്മദ് ബഷീര്‍ എം.പി, പാണക്കാട് അബ്ബാസലി ശിഹാബ് തങ്ങള്‍, റഷീദലി ശിഹാബ് തങ്ങള്‍, പി.വി അബ്ദുല്‍വഹാബ് എം.പി, ഡോ. എം.പി അബ്ദുസമദ് സമദാനി എം.പി, ഡോ. എം.കെ മുനീര്‍ എം.എല്‍.എ, പി.എം.എ സലാം,  കെ.പി.എ മജീദ് എം.എല്‍.എ, പാണക്കാട് മുനവറലി ശിഹാബ് തങ്ങള്‍, കെ.എം ഷാജി, പി.കെ ഫിറോസ്, പി.കെ നവാസ്, പാറക്കല്‍ അബ്ദുല്ല തുടങ്ങിയവർ സംസാരിച്ചു.