തിരുവനന്തപുരം: തലസ്ഥാനത്തെ സ്വകാര്യ സ്കൂളിൽ ഹിജാബ് ധരിച്ചതിന്റെ പേരിൽ വിദ്യാർഥിനികൾക്ക് അഡ്മിഷൻ നിഷേധിച്ചതായി ഗുരുതര ആരോപണം. മുക്കോലയ്ക്കലിലെ സെന്റ് തോമസ് സെൻട്രൽ സ്കൂളാണ് വിവാദത്തിന്റെ കേന്ദ്രത്തിൽ. മാർത്തോമാ ചർച്ച് എജ്യുക്കേഷനൽ സൊസൈറ്റിയുടെ കീഴിൽ പ്രവർത്തിക്കുന്ന ഈ സ്കൂളിൽ ഹിജാബ് ധരിച്ചെത്തുന്ന വിദ്യാർഥിനികൾക്ക് പ്രവേശനം അനുവദിക്കില്ലെന്ന് പ്രിൻസിപ്പൽ അറിയിച്ചതായി രക്ഷിതാക്കൾ ആരോപിക്കുന്നു.

വട്ടിയൂർക്കാവ് സ്വദേശികളായ രണ്ട് വിദ്യാർഥിനികൾ പ്ലസ് വൺ മാനേജ്മെന്റ് സീറ്റുകളിലേക്ക് അപേക്ഷ നൽകിയിരുന്നു. എന്നാൽ, ഹിജാബ് ധരിച്ച് ക്ലാസിൽ പ്രവേശിക്കാൻ അനുവാദമില്ലെന്ന് പ്രിൻസിപ്പൽ വ്യക്തമാക്കിയതായി രക്ഷിതാക്കൾ പറയുന്നു. ഇതുസംബന്ധിച്ച് രക്ഷിതാക്കളും പ്രിൻസിപ്പലും തമ്മിലുള്ള സംഭാഷണവും പുറത്തുവന്നിട്ടുണ്ട്.

എന്നാൽ, ആരോപണങ്ങളോട് പ്രതികരിച്ച സ്കൂൾ അധികൃതർ, യൂനിഫോം നിർബന്ധമായി പാലിക്കണമെന്ന് മാത്രമാണ് അറിയിച്ചതെന്ന് വ്യക്തമാക്കി. വിദ്യാർഥികൾക്കിടയിൽ മതപരമായ വേർതിരിവ് ഉണ്ടാകരുതെന്നാണ് തങ്ങളുടെ നിലപാടെന്നും സ്കൂൾ അധികൃതർ പറഞ്ഞു.