തിരുവനന്തപുരം: പൊലിസ് തലപ്പത്ത് അടുത്ത മാസം മുതല്‍ വന്‍ അഴിച്ചു പണി. നിലവിലെ ക്രമസമാധന ചുമതലയിലുള്ള എഡിജിപി മനോജ് എബ്രഹാമിന് ഡിജിപി പദവി ലഭ്യമാവുന്നതോടെ ആ പദവിയിലേക്ക് ഇനി എംആര്‍ അജിത് കുമാറിനെ നിയമിക്കുമോ എന്നത് പ്രധാനമാണ്. 

നിലവിലെ സംസ്ഥാന പൊലിസ് മേധാവി വിരമിക്കുന്നതോടെ ജൂലൈയില്‍ വീണ്ടും പൊലിസ് തലപ്പത്ത് മാറ്റം വരുത്തുന്നതാണ്. ഫയര്‍ഫോഴ്‌സ് മേധാവിയായ കെ പത്മകുമാര്‍ വിരമക്കുന്നതോടെ മേയില്‍ സംസ്ഥാന പൊലിസ് തലപ്പത്ത് വലിയ അഴിച്ചു പണി തന്നെ ഉണ്ടാകും. ഡിജിപി റാങ്കിലുള്ള കെ പത്മകുമാര്‍ വിരമിക്കുന്നതോടെ മനോജ് എബ്രഹാമിനായിരിക്കും ഡിജിപി പദവി നല്‍കുക. 

ജൂണില്‍ നിലവിലെ സംസ്ഥാന പൊലിസ് മേധാവി ഷൈഖ് ദര്‍വേഷ് സാഹിബ് വിരമിക്കുന്നതോടെ ജൂലൈ ആദ്യവാരത്തില്‍ വീണ്ടും അഴിച്ചു പണി വേണ്ടിവരും. കേന്ദ്ര ഡെപ്യൂട്ടേഷനില്‍ പോയ റാ വാഡ ചന്ദ്രശേഖരന്‍ തിരിച്ച് വരാന്‍ സാധ്യതയും കുറവാണ്. കേന്ദ്രം അയക്കുന്ന 3 പേരുടെ ചുരുക്ക പട്ടികയില്‍ നിന്നു ഒരാളെ സംസ്ഥാന സര്‍ക്കാര്‍ സംസ്ഥാന പൊലിസ് മേധാവിയായി നിയമിക്കുന്നതായിരിക്കും. 

കേന്ദ്രം അയക്കുന്ന ചുരുക്കപട്ടികയില്‍ എംആര്‍ അജിത്കുമാര്‍ ഉണ്ടാകുമോ എന്നതും പ്രധാനമാണ് . മനോജ് എബ്രഹാം ക്രമസമാധന ചുമതലയില്‍ നിന്നു മാറുമ്പോള്‍ എംആര്‍ അജിത് കുമാറിനെ ആ കസേരയില്‍ തിരിച്ചെത്തിക്കുമോ എന്നതിലും വ്യക്തതയില്ല. രണ്ട് മാസം കഴിഞ്ഞാല്‍ വീണ്ടും അഴിച്ചു പണി വരുന്നതിനാല്‍ സാധ്യതയും കുറവാണ്.