കൊച്ചി: ലഹരി പരിശോധനയ്ക്കിടെ കൊച്ചിയിലെ ഹോട്ടൽ മുറിയിൽ നിന്ന് ഓടി രക്ഷപ്പെട്ട സംഭവത്തിൽ നടൻ ഷൈൻ ടോം ചാക്കോ പൊലീസിന് മുന്നിൽ ഹാജരായി. രാവിലെ 10.30ന് ഹാജരാകുമെന്നാണ് പൊലീസ് അറിയിച്ചിരുന്നത്. എന്നാൽ, അരമണിക്കൂർ മുമ്പ്, 10 മണിക്ക് അഭിഭാഷകർക്കൊപ്പം എറണാകുളം നോർത്ത് പൊലീസ് സ്റ്റേഷനിൽ ഷൈൻ എത്തി.

ഹോട്ടൽ മുറിയിൽ നിന്ന് ഓടിയതിന്റെ കാരണം വിശദീകരിക്കണമെന്ന് ആവശ്യപ്പെട്ട് പൊലീസ് നൽകിയ നോട്ടീസിന്റെ അടിസ്ഥാനത്തിലാണ് ഷൈൻ ഹാജരായത്. ഇതുമായി ബന്ധപ്പെട്ട് പൊലീസ് ചോദ്യാവലി തയ്യാറാക്കിയിട്ടുണ്ട്. ഈ ചോദ്യങ്ങളുടെ അടിസ്ഥാനത്തിൽ ചോദ്യം ചെയ്യൽ നടക്കും. ഷൈനിന്റെ രക്ഷപ്പെടലിന് പിന്നിലെ കാരണം വ്യക്തമായി മനസ്സിലാക്കാനാണ് പൊലീസിന്റെ ശ്രമം. ഇതിനായി കഴിഞ്ഞ ഒരു മാസത്തെ ഷൈനിന്റെ ഫോൺ കോളുകൾ പൊലീസ് പരിശോധിച്ചു. കൂടാതെ, ഈ കാലയളവിൽ ഷൈൻ താമസിച്ച ആറ് ഹോട്ടലുകളിലെ സിസിടിവി ദൃശ്യങ്ങളും പരിശോധിച്ചിട്ടുണ്ട്.

ഹോട്ടൽ മുറിയിൽ നിന്ന് ഓടിയ സംഭവത്തിൽ വിശദീകരണം നൽകാൻ ആവശ്യപ്പെട്ട് എറണാകുളം നോർത്ത് പൊലീസ് ഷൈനിന്റെ തൃശൂർ വീട്ടിൽ നോട്ടീസ് നൽകിയിരുന്നു. ശനിയാഴ്ച രാവിലെ 10.30ന് ഹാജരാകണമെന്നായിരുന്നു നിർദേശം. എന്നാൽ, ഇന്ന് വൈകീട്ട് ഹാജരാകുമെന്ന് ഷൈനിന്റെ കുടുംബം അറിയിച്ചിരുന്നു. എന്നിട്ടും, നിശ്ചയിച്ച സമയത്തിന് അരമണിക്കൂർ മുമ്പ് ഷൈൻ ഹാജരായി.

ലഹരി പരിശോധനയ്ക്കായി ഡാൻസാഫ് സംഘം ഹോട്ടലിൽ എത്തിയപ്പോൾ എന്തിനാണ് ഓടി രക്ഷപ്പെട്ടതെന്നാണ് പൊലീസ് പ്രധാനമായും ചോദിക്കുന്നത്. സെൻട്രൽ എസിപിയുടെ നേതൃത്വത്തിലാണ് ഷൈനിനെ ചോദ്യം ചെയ്യുന്നത്. ഷൈൻ ഓടി രക്ഷപ്പെട്ടതിന് പിന്നാലെ ഹോട്ടൽ മുറിയിൽ നടത്തിയ പരിശോധനയിൽ ലഹരി വസ്തുക്കൾ ഒന്നും കണ്ടെത്തിയിരുന്നില്ല.