അഹമ്മദാബാദ്: ഐപിഎല്ലിലെ കരുത്തരുടെ പോരാട്ടത്തിൽ ഡൽഹി  ക്യാപ്പിറ്റൽസിനെതിരെ ഗുജറാത്ത് ടൈറ്റൻസിന് 204 റൺസിന്റെ വിജയലക്ഷ്യം. ഗുജറാത്തിന്റെ തട്ടകമായ അഹമ്മദാബാദ് നരേന്ദ്രമോദി സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ ഗുജറാത്ത് നായകൻ ശുഭ്മൻ ഗിൽ ബൗളിംഗ് തെരഞ്ഞെടുക്കുകയായിരുന്നു. ടോസ് നഷ്ടപ്പെട്ട് ആദ്യം ബാറ്റ് ചെയ്ത ക്യാപ്പിറ്റൽസ് 20 ഓവറിൽ എട്ട് വിക്കറ്റ് നഷ്ടത്തിൽ 203 റൺസ് ആണ് നേടിയത്.

മത്സരത്തിൽ ഡൽഹി താരം കെഎൽ രാഹുൽ സിക്സറുകളിൽ ഒരു പുതിയ നേട്ടമാണ് കൈപ്പിടിയിലാക്കിയത്.  ഐപിഎല്ലിൽ 200 സിക്സറുകൾ പൂർത്തിയാക്കാനാണ് താരത്തിന് സാധിച്ചത്. ഈ നേട്ടത്തിന് മറ്റൊരു പ്രത്യേകത കൂടിയുണ്ട്. ഐപിഎൽ ചരിത്രത്തിൽ ഏറ്റവും വേഗത്തിൽ 200 സിക്സറുകൾ സ്വന്തമാക്കുന്ന ഇന്ത്യൻ താരമായും രാഹുൽ മാറിയിരിക്കുകയാണ്. 129 ഇന്നിംഗ്സുകളിൽ നിന്നുമാണ് രാഹുൽ സിക്സറുകളിൽ ഡബിൾ സെഞ്ച്വറി പൂർത്തിയാക്കിയത്.

ഇതിനുമുമ്പ് ഈ നേട്ടം രാജസ്ഥാൻ റോയൽസ് നായകൻ സഞ്ജു സാംസന്റെ പേരിലായിരുന്നു ഉണ്ടായിരുന്നത്. 159 ഇന്നിംഗ്സുകളിൽ നിന്നുമായിരുന്നു സഞ്ജു ഈ നേട്ടം സ്വന്തമാക്കിയിരുന്നത്. 165 ഇന്നിംഗ്സുകളിൽ നിന്നും 200 സ്വന്തമാക്കിയ എംഎസ് ധോണിയാണ്  ഈ പട്ടികയിൽ മൂന്നാംസ്ഥാനത്ത് ഉള്ളത്. വിരാട് കോഹ്‌ലിയാണ് നാലാമൻ. 180 ഇന്നിംഗ്സുകളിൽ നിന്നുമാണ് വിരാട് ഈ നേട്ടത്തിലേക്ക് കാലെടുത്തുവെച്ചത്.

മത്സരത്തിൽ 14 പന്തിൽ 28 റൺസ് ആണ് രാഹുൽ അടിച്ചെടുത്തത്. നാല് ഫോറുകളും ഒരു സിക്സും അടങ്ങുന്നതായിരുന്നു താരത്തിന്റെ ഇന്നിംഗ്സ്. രാഹുലിനു പുറമേ  ക്യാപ്റ്റൻ അക്സർ പട്ടേൽ 39 റൺസും അശുതോഷ് ശർമ 37 റൺസും  ട്രിസ്റ്റൻ സ്റ്റംപ്സ്, കരുൺ നായർ എന്നിവർ 31 റൺസും നേടി മികച്ചു നിന്നു. 

 ഗുജറാത്തിന്റെ ബൗളിങ് നിരയിൽ നാല് വിക്കറ്റുകൾ നേടി പ്രസിദ് കൃഷ്ണ മികച്ച പ്രകടനമാണ് നടത്തിയത്. മുഹമ്മദ് സിറാജ്, അർഷാദ് ഖാൻ, ഇശാന്ത് ശർമ, സായ് കിഷോർ എന്നിവർ ഓരോ വിക്കറ്റുകളും സ്വന്തമാക്കി.

KL Rahul Break Sanju Samson great record in ipl history